Baankichi baatiwwan saddeettan darban liqaa Birrii biiliyoona 200 fi biiliyoona 64 maamiltootaaf dhiyeessuu beeksise
Finfinnee, Bitootessa 24, 2017 (FMC) – Baankiin Daldalaa Itiyoophiyaa baatiwwan saddeettan darban liqaa Birrii biiliyoona 200 fi biiliyoona 64 ol maamiltootaaf dhiyeessuu beeksiseera.
Pireezidaantiin Baankii Daldalaa Itiyoophiyaa obbo Abbee Saannoon raawwii hojii baatiwwan saddeettan darbanii Mana Maree Bakka Bu’oota Ummataatti Koree Dhaabbii Dhimmoota Dhaabbilee Misoomaa Mootummaaf dhiyeessaniiru.
Baankichi fayyadamummaa lammiilee guddisuuf liqaawwan haaraa beeksisaa jiraachuu gabaasichaan kaasaniiru.
Baatiwwan saddeettan darban keessa liqaan Birriin biiliyoonni 200 fi biiliyoonni 64 ol maamiltootaaf kennamuu dubbataniiru.
Liqaa kenname keessaa % 88.2 damee dhuunfaaf kennamuu himaniiru.
Waliigala Maallaqni Liqaan kenname Birrii Tiriiliyona 1.39 gahuu eeraniiru.
Filannoowwan diijitaalaan liqaan Birrii biiliyoonni 3.9 ol dhiyaachuu ibsuu ragaan fuula baankicharraa argame ni mul’isa.