Tiraampi Hoggantoota Raashiyaa fi Chaayinaa waliin Baajata Waraanaa hir’isuuf mari’achuun barbaada jedhan

Finfinnee, Guraandhala 7, 2017 (FMC) – Pireezidaatiin Ameerikaa Doonaald Tiraampi Pireezidaantii Raashiyaa Viilaadmiir Puutiinii fi kan Chaayinaa Zyii Shiinpiing waliin Baajata Waraanaa fi Kuufama Niwukleerii hir’isuuf mari’achuu kan barbaadan ta’uu ibsan.

Baajata waraanaa walakkaa oliin hir’isuuf mari’achuu kan barbaadan ta’uu ‘Al Jazeera’n gabaaseera.

Tiraampi ibsa Miidiyaaleef kennaniin, biyyoota lamaan waliin wal arganii mari’achuuf abdii qabaachuu dubbataniiru.

Waashingitan waraana addunyaa balleessuu danda’u osoo qabduu Humna Niwukleerii haaraa ijaaruuf sababni tokkooyyuu hin jiru jedhan.

Maallaqa ummataa misooma biroof oolchuun barbaachisaa ta’uu ibsa isaaniin himaniiru.

Marii tibba darbe bilbilaan Pireezidaantii Raashiyaa Viilaadmiir Puutiin waliin taasisaanirratti dhimma meeshaalee waraanaa hir’isuurratti mari’achuu isaanii himameera.

Ameerikaan Baajata olaanaa Waraanaaf ramaduun addunyaarraa adda dureedha.

Chaayinaa fi Raashiyaan ammoo itti aanu.

Ameerikaan bara 2025 Doolaara biiliyoona 800 fi biiliyoona 95 waraanaaf yoo ramaddu, Chaayinaan Doolaara biiliyoona 100 fi biiliyoona 85 ni ramaddiin eegama.

Akka gabaasa Dhaabbata Qorannoo Tarsiimoo Idil Addunyaatti Raashiyaan bara darbe Doolaara biiliyoona 100 fi biiliyoona 45.9 waraanaaf baasii gooteetti.

#Oromia #Ethiopia