Ingiliz guddina gabaa kaappitaalaaf deeggarsa akka taasistu ibsite

Finfinnee, Guraandhala 13, 2017 (FMC)- Itiyoophiyaatti gabaa Kaappitaalaa eegalame guddisuuf Ingiliz deeggarsa akka taasistu Ministirri Muummee Ittaantuu Biyyattii Anjeelaa Reeynar ibsan.

Anjeelaa Reeynar damee walta’iinsa dinagdee Itiyoophiyaa fi Ingiliz irratti xiyyeeffachuun ibsa kennaniin, jijjiirama diinagdee Itiyoopiyaatti mul’ataa jiru kan dinqisiifatamuudha jedhan.

Biyyoonni lameen walta’iinsaan hojjechaa jiraachuu eeranii, abbootiin qabeenyaa Ingiliz hojiilee invastimantii damee inarjii, geejjibaa fi kanneen biroo akka cimsan ibsaniiru.

Gabaa kaappitaalaa dhiyeenya Itiyoophiyaan eegaltes daran guddisuuf deeggarsa akka taasisan himaniiru.

Imala teeknooloojii hubannoo namtolcheen Itiyoophiyaan eegaltes dinqisiifatanii, damichaaf deeggarsaa fi tumsa akka taasisan eeraniiru.

Ministirri Ministeera Maallaqaa Obbo Ahimad Shideen gama isaaniin, tarkaanfii haaromsaa mootumman fudhatee diinagdee biyyattii akka dadammaqse dubbataniiru.

Keessumaa waggoottan ja’an darban damee hedduurratti misooma diinagdeen bu’aalee olaanaan galmaa’uu yaadachiisaniiru.

Dhaabbileen misoomaa mootummaa daran bu’aa qabeessaa ta’uun dinagdee gumaacha fooyya’aa taasisaa jiraachuu kaasaniiru.

Itiyoophiyaan imala guddina saffisaa irratti akka argamatu kan himan Obbo Ahimad Shideen, Mootumman Ingiliz deeggarsa hojiilee misoomaa gargaraattii taasisaa jiruuf galateeffataniiru.

Daayrektarri Olaantuu Abbaa Taayitaa Gabaa Kaappitaalaa Itiyoophiyaa Haannaa Tahalquu akka ibsanitti, mootummaan damee diinagdee irratti tarkaanfiilee fudhachaa jiruun dhaabbilee damichaaf murteessoon akka hundeeffaman taasiseera jedhan.

Haaluma kanaan hojiileen dameewwan guddina diinagdee saffisiisan hojjetamaa jiraachuu ibsaniiru.

Hoji Raawwachiisaa Olaanaan Gabaa Qabeenya Sanadaa Itiyoophiya Dooktar Xilaahuun Ismaa’eel ammoo, Mootummaan Ingiliz ka’umsarra eegalee hanga ammaatti deeggarsa teekinikaa fi kanneen biroo taasisaa jiruuf galateeffataniiru.

#Oromia #Ethiopia