Adeemsa Itiyoophiyaan miseensummaa DhDA’f taasistu kara faayidaa biyyaalessaa kabachiiseen ta’a- Dooktar Kaasaahun Goofee
Finfinnee, Guraandhala 22, 2017 (FMC) – Adeemsa Itiyoophiyaan miseensummaa Dhaabbata Daldalaa Addunyaaf taasistu kara faayidaa biyyaalessaa ishee kabachiiseen akka ta’uuf hojjetamaa jiraachuu Ministirri Ministeera Daldalaa fi Walitti Hidhamiinsa Naannawaa Dooktar Kaasaahuun Goofeen ibsan.
Miseensummaa dhaabbatichaaf Walga’ii Garee Hojii marsaa 5ffaa Bitootessa 19/2025 gageeffamuuf sadarkaa Koree Teekinikaatti guyyoottan 3 darbaniif qophii bal’aan taasifamaa turuu Dooktar Kaasaahuun miidiyaa hawaasummaa isaaniin yaadachiisaniiru.
Guyyaa kaleessaa irraa eegalee ammoo miseensonni Koree Mariisitootaa Biyyaalessaa hojii qophii koree teekinikaa magaalaa Bishooftuutti gamaaggamaa jiraachuu ibsaniiru.
Dhimmoota marichaan deebiin itti laatamu keessumaa seerota daldalaa fi daldalaan walqabatan, dhimmoota teekinikaa daldalaaf rakkoo ta’uu danda’an, eenyama daldala alaa, hammattoowwan invastimantii, hojimaataa fi bulchiinsa dhaabbilee misoomaa mootummaa, dhimmoota dhiyeessiifi bulchiinsa sharafa alaa, kaffaltiiwwan tajaajilaa garaagaraa gibiraan walqabatanii fi dhimmoota biroorratti mari’atamaa jiraachuu eeraniiru.
Dhimmi miseensummaa Dhaabbata Daldalaa Addunyaa milkeessuu karaa faayidaa biyyaalessaa Itiyoophiyaa eegsiseen akka hojjetamuuf ejjennoo cimaan qabatamuu ibsaniiru.