Pireezidaanti Shimallis ergaa baga geessanii dabarsan

Finfinnee, Bitootessa 20, 2017 (FMC)_Pireezidaantiin Mootummaa Naannoo Oromiyaa Obbo Shimallis Abdiisaan Ayyaana Iid Alfaxiir waggaa 1446ffaa sababeeffachuun hordoftoota Amantaa Muslimaa maraaf ergaa baga geessanii dabarsaniiru.

Guutuun ergaa isaanii akka itti aanuutti dhiyaateera.

Baatiin Raamadaanaa ayyaana hordoftoota Amantaa Muusiliimaa biratti hawwii guddaadhaan eegamu; guyyaa soomaan halkan salaataan akkasumas Quraanni barsiifamaa rabbirraa araara kan ittiin barbaadaniidha. Baatiin kun kan balballi jannataa itti banamtee balballi jahannamaa itti cufamtuufi ji’a Quraanni keessatti bu’e ta’uunis adda kan isa taasisudha.

Gaarummaan qajeeltoo Quraanaatiin baatii Ramadaanaa keessa raawwatamus kan yeroo biroo irra dachaan kan caalu keeyriin ji’a kana keessa argamus Rabbiin qofti kan beeku ta’uu ergamaan Rabbii Nabiyyuu Muhaammad (SAW) ragaa ba’uu qajeeltoo amantichaa keessatti hammatamee jira.

Kanaaf baatii Raamadaanaa keessa akkuma hiikoon Islamaa nagaa ta’e nagaa waliif yaadanii jibba maksanii qaamaafi qalbiin araara buusuun raahamata waliif yaaduu, kan beela’e nyaachisuu, kan daare uffisuu, kan dhibame gaafachuu, qaamaafi qalbiin wal bira dhaabbachuun qajeeltoo amantaa Islaamaa ta’eetu beekama.

Kanaaf baatiin Ramadaanaa kan araaraafi nagaan itti labsamu jibbaafi haaloo qabannaan itti makfamu ji’a Rahaamataa ta’eetu beekama. Sooma Hiikaa bara kanaa irrattis duudhaa gaarii kana jabeessaa sagantaa Ifxaraa gurguddaas gaggeessaa qajeelfama Amantichaa karaa eegeen gaarummaan raawwatamaa tureera.

Hordoftoonni Amantaa Islaamaa naannoofi biyya keenyaa hundi baga Sooma Hiikaa waggaan 1446ffaa nagaan geessan baga waliin geenye jechuun barbaada.

Mootummaan Naannoo Oromiyaa walqixxummaa amantaalee heera biyya keenyaatiin gonfanne bu’uureessuun amantaaleen garaa garaa karaa waldanda’uufi wal kabajuutiin biyya waloon qabnu keessa waliin jiraachuun akka danda’amuuf bu’uura amansiisaa gad dhaabaa jira. Amantaaleen garaa garaa naannoo keenya keessatti argaman waliif gaachanaafi abdii malee sodaa miti.

Biyya waloo qofa kan waliin qabnu osoo hin taane hordoftoonni Amantaalee garaa garaa walirraa fuudhanii walitti heerumsiisuun dhiigaan walitti hidhamaniiru. Obbolummaafi ollummaa jabeessuun yeroo rakkoofi gammachuu waliin dhaabbachuun dabarsaniiru. Barii jijjiiramaa irraa eegaluunis duudhaa gaarii ganamaa horanne tikfachuun maraammartoo hiyyummaa waloon injifannee badhaadhina waloo eegalle milkeessuuf aarsaa qaalii waloon kaffallee injifannoo waloo galmeessaa jirra.

Kanaafis imalli imalle milkaa’aa injifannoon gonfannes abdachiisaadha. Tokkummaa keenya cimsachuun diina garaa garummaa keenya adamsee nu diiguuf aggaamu qolannee ijaarsa biyya waloo hundaan hundaaf hundarraa eegalle fiixaan baasuuf kutannoon hojjechuun hunda keenyarraa kan eegamudha.

Kabajamtoota hordoftoota Amantaa Islaamaafi uummatni naannoo keenyaa akkuma nageenyaafi tokkummaa keenyaaf xiyyeeffannoo olaanaa kenninu maraammartoo hiyyummaa moo’achuun gadadoo keessaa ba’uuf waktiilee hunda yeroo misoomaa taasisuun murteessaadha.

Hojii misoomaa hojjennu hunda qulqullina, baay’inaafi ariitiidhaan milkeessuun Oromiyaatti dinagdee jabaa ijaaruun hiyyummaa gochaan seenaa taasisuuf hojjetamuu qaba. Kanaafis mootummaan Naannoo Oromiyaa hiyyummaafi gargaaramtummaan qaanii ta’uu lammilee hubachiisuun badhaadhina milkeessuuf kutannoon hojjechaa jiraachuu isiniif dhugoomsuun barbaada.

Dhumarratti , ayyaanni Iid al fixir bara Hejiraa 1446ffaan kan tokkummaa keenya ittiin jabeessinu, nageenya keenya waloon tiksinu, hiyyummaa didnee badhaadhinaaf harka keenya diriirsinu, kan rakkataa gargaarree eebba uumaa biraa itti argannu, tokkummaa cimsinee walooma itti gabbifabnu, araaraa labsinee jibbaa fageessinu nuuf haa ta’u jechaa ayyaanichi kan milkiifi nagaa akka ta’un hawwa. Ayyaana gaarii; Iid Mubarek!

Oromiyaa ni ijaarra,
Itoophiyaa ni Utubna,
Gaanfa Afrikaa ni Tasgabbeesina
Waaqayyos nugargaara!

Shimallis Abdiisaa, Pirezidantii Mootummaa Naannoo Oromiyaa
Bitooteessa, 2017
Finfinnee