Agarsiisni imala Mootummaa Naannoo Oromiyaa maqaa gaarii naannichaa kan olkaasedha- Obbo Hayiluu Addunyaa

Finfinnee, Bitootessa 27, 2017(FMC) – Agarsiisni imala Mootummaa Naannoo Oromiyaa guyyoota sadan darban agarsiifamaa ture maqaa gaarii naannichaa kan olkaasedha jedhan Hogganaan Biiroo Kominikeeshinii Oromiyaa Obbo Hayiluu Addunyaa.

Agarsiisni imala Mootummaa Naannoo Oromiyaa waggoota 7n darban qindeessummaa Biiroo Kominikeeshinii Oromiyaatin qophaa’ee guyyoota sadan darban agarsiifamaa ture bakka hooggantoonnifi keessummoonni garaa garaa argamanitti goolabameera.

Obbo Hayiluu Addunyaa sagantaa cuufiinsaa kanarratti haasaa taasisaniin, Mootummaan Naannoo Oromiyaa cabiinsa gama hawaasummaa, siyaasaafi dinagdeen ture qolachuun Imala Badhaadhinaa waggoota torban darbeetiin injifannoowwan gurguddoo egeree Oromiyaa bu’uura jabaa irratti ijaaruu danda’an galmeesseera jedhan.

Egzibiishiniin agarsiifamaa ture maqaa gaarii naannichaa kan olkaase ta’uus dubbataniiru.

Imalli badhaadhinaa eegalame ragaan deeggaramuun ijaarsa egereef bu’uura kaa’aa jiraachuu sagantaa itti agarsiifame ta’uus kaasaniiru.

Agarsiisichi Biiroleen hojmaata ragaa kuusuu, tursiisuufi agarsiisuu akka shaakalan kan taasise, barnoota wal irraa akka barataniif kan gargaare ta’uus ibsaniiru.

Ragaawwan ammayyeessuu wajjin wal qabatees ijaarsa dijjitaal Oromiyaaf haala mijaawaa uumeera jedhan.

Kana malees Biiroleen hojii isaanii irratti iftoomina uumuufi tajaajilamaa irraa yaadaaf galtee hojii fudhachuuf kan gargaare sagantaa waloomaan milkaa’e ta’uu ibsaniiru.

Walumaa galatti sagantaa Egzibiishinii Imala Mootummaa waggoota torban darbee kan itti agarsiifne Imala Badhaadhinaa kan itti olqabneedhas jechuu ragaan komimnikeeshinii Oromiyaarraa argame ni mul’isa.