Aanaalee 971 keessatti ajandaawwan maree biyyaalessaatiif galtee ta’an walitti qabaman- Komiishinicha

Finfinnee, Amajjii 17, 2017 (FMC) – Komishiniin maree biyyaalessaa adeemsa marii biyyaalessaan aanaalee 971 keessatti ajandaawwan galtee ta’an walitti qabamuu beeksise.

Komishinichi dhimmoota Itiyoophiyaa bu’uura ta’an irratti sababoota madda garaagarummaa fi waliigaltee dhabuu ta’an, ajandaawwan adda bahan irratti marii biyyaalessaa gaggeessuun waliigaltee biyyaalessaa uumuuf hojjetaa akka jiru ibseera.

Dubbi himaan Komishinii Maree Biyyaalessaa Itiyoophiyaa Obbo Tibabuu Taaddasaa akka ibsaanitti Komishinichi ajandaa bu’uuraa fi biyyaalessaa irratti sababoota waliigaltee fi wal-hubannoo dhabuu hawaasa keessaa adda baasuun dhimmoota garaagarummaan itti uumame irratti hubannoo waloo irra ga’uuf haala mijataa uumuuf hojjechaa jira.

Marii kanarratti hirmaattota ummata bakka bu’anii naannolee fi bulchiinsa magaalotaa keessatti hirmaatan filachuu fi mata dureewwan adda addaa waliigaltee biyyaalessaa fiduu qaba jedhanii amanan irratti ajandaa walitti qabuun hojiin bal’aan raawwatamuu ibsaniiru.

komishinichi adeemsa ajandaa walitti qabuu bakka adda addaatti gaggeessaa ture keessatti bakka bu’oonni hawaasaa kuma 18 ol dammaqinaan hirmaachuu isaanii eeraniiru.

Guutummaa biyyattiitti aanaalee 971 keessatti ajandaawwan marii kanaaf galtee ta’anii tajaajilan walitti qabuuf hojjetamaa jiraachuus ibsaniiru.

Adeemsa kana keessattis ummanni ajandaawwan nagaa fi misooma waliigalaa biyyattiif gufuu ta’an jedhee amanee fi sadarkaa biyyaatti waliigaltee barbaadan hedduu komishinichaaf dhiyeessee jira.

Itti dabaluunis naannolee hanga ammaatti ajandaa walitti qabuun hin raawwatamne keessatti adeemsa walitti qabuu kana raawwachuuf qooda fudhattoota dhimmi ilaallatu waliin qindoominaan hojjetamaa jiraachuu ibsaniiru.

Yeroo ammaa kana ajandaawwan hanga ammaatti walitti qabaman sirnaan qindeessuun sirrii ta’uu isaanii sakatta’uu irratti hojjechaa akka jiran himaniiru.

Lammiileen Itiyoophiyaa sadarkaa sadarkaan jiranis milkaa’ina marii biyyaalessaa kanaaf gumaacha olaanaa taasisaa jiraachuus kaasaniiru.

Paartileen siyaasaa hanga ammaatti adeemsa marii biyyaalessaa adeemsifamaa jiru irratti hin hirmaanne fi qooda fudhattoonni biroo dhimmicha irratti hirmaachuu fi qooda isaanii akka gumaachan waamicha dhiyeessaniiru

#Oromiyaa #Ethiopia