Ameerikaan waljijjiirraa odeeffannoo nageenyaa Yuukireen waliin qabdu adda kutte

Finfinnee, Guraandhala 27, 2017 (FMC)-Ameerikaan waljijjiirraa odeeffannoo nageenyaa Yuukireen waliin qabaachaa turte adda kutuu beeksifte.

Waashingitaniifi Keeyiv waraanni Raashiyaafi Yuukireen wayita eegalerraa kaasee odeeffannoowwan nageenyaa waljijjiiraa turuun yaadachiifameera.

Bulchiinsi Pireezidaanti Doonaald Tiraamp waljijjiirraan odeeffannoo nageenyaa biyyoota lameenii addaan akka citu murtoo dabarsuu Gorsaan Dhimma Nageenyaa Biyyaalessaa Ameerikaa Maayik Waalz mirkaneessaniiru.

Murtoon kun yeroo hagamiif hojiirra akka oolu wanti jedhame hin jiru jechuun BBCn gabaaseera.

Ameerikaan marii Doonaald Tiraampiifi Vooloodmiir Zalaniiskii waliigaltee malee xumurame hordofee guyyoottan dura deeggarsa loltummaa  Keeyiviif taasistu  addaan kutuun ishee kan yaadatamudha.

Pireezidaanti Doonaald Tiraamp haasawaa Walga’ii Kongiransii Waloo Waashingitanitti taa’amerratti  taasisaniin, Pireezidaanti Vooloodmiir Zalaniiskiin xalayaa biyyi isaanii Ameerikaa waliin hojjechuuf qophii akka taate ibsu erguufii beeksisuun isaanii kan yaadamudha.