Finfinnee, Bitootessa 23, 2017 (FMC) – Baatiiwwan saddettan darban damee hoortiikaalchariirraa galiin Doolaarri miiliyoonni 300 fi miiliyoonni 66 argamu Ministirri Ministeera Qonnaa Dooktar Girmaa Amanteen ibsan.
Dandeettii guddaa damichaan jiru haalaan fayyadamuuf mootummaan xiyyeeffannoo kennee hojjechaa jiraachuus kaasaniiru.
Mootummaan qaamolee damicharratti bobba’an waliin walitti dhiyeenyaan hojjechaa jiraachuu eeruun, fuulduratti deeggarsa garaagaraa taasisuun damicha kana caalaatti guddisuuf ni hojjetas jedhan.
Agarsiisni Hoortiikaalcharii Idil-Addunyaa mata duree” Hoortiikaalcharii Galma Waaraa Biyyaalessaaf’ jedhuun Galma Barkumeetti gaggeeffamaa jira.
Agarsiisichi Waldaa Oomishtootaafi Al-ergitootaa Hoortiikaalcharii Itiyoophiyaan kan qophaa’e yoo ta’u, abbootiin qabeenyaafi dippiloomaatonni biyyoota garaagaraa irratti hirmaachaa jiru.
Dura Taa’aan Waldaa Oomishtootaafi Al-ergitootaa Hoortiikaalcharii Itiyoophiyaa obbo Naggaa Makuwaaniint, gahee dameen hoortiikaalcharii diinagdee biyyaa keessatti bahatu yeroodhaa gara yerootti guddachaa jiraachuu ibsaniiru.
Ashabbir Kaasaahuuntu gabaase.