Finfinnee, Guraandhala 17, 2017 (FMC)–Beekumsaa fi horataalee keenya caalmaan misooma barnootaa egeree keenya qajeelchan irratti dhangalaasuu qabna jechuun Pireezidaantiin Mootummaa Naannoo Oromiyaa Shimallis Abdiisaan dhaaman.
Mootummaan Naannoo Oromiyaa, hojiilee misoomaafi hawaasummaa hidhata ummattoota keenyaa cimsuu danda’an kamuu Mootummaa Naannoo Beenishaangul Gumuzifi naannolee hafan hunda waliin qindoominaafi tumsa walootiin hojjechuuf yeroo kamuu caalaa qophiidha jedhaniiru.
Guutuun ergaa isaanii akka itti aanutti dhiyaateera.
Naannoo Beeniishaangul Gumuz, magaalaa Asoosatti argamuun sirna eebba mana barumsaa Ifa Boruu Sadarkaa 2ffaa Baaroo, Mootummaa Naannoo Oromiyaatiin ijaaramee irratti argamuun gammachuu ummata naannichaa qooddachuu kootti hedduun gammada.
Akkuma yeroo maraa, har’as garana yeroon imalu miira keessummaatiin osoo hintaane, gammachuu nama maatii isaatti deebi’ee dhufeetin Ummanni Beeniishaangul Gumuz ummata Oromoo waliin hidhata seenaa boonsaafi dheeraa kan qabuudha.
Manni Barumsaa har’a eebbifne kun dhaabbata barnootaa qofa miti.
Mallattoo jabaa obbolummaa, tumsaafi guddina waliinii ummata Naannoolee Oromiyaafi Beenishaangul-Gumuziif michichila seenaa cimaadha.
Diinni waloo ummata obbolaa keenyaa hiyyummaafi boodatti hafummaadha.
Qorichi isaa ammoo barnoota qulqullina qabu babaldhisuun dhaloota dorgomaa umuudha.
Kanaafis, beekumsaafi horataalee keenya caalmaan misooma barnootaa egeree keenya qajeelchan irratti dhangalaasuu qabna.
Mootummaa Naannoo Oromiyaa, ummatoonni obbolaas galma kana akka qooddatan ejjannoo qabatee manneen barnootaa Ifa Boruu Sadarkaa Lammaffaa naannolee hundatti ijaaree eebbisiisaa jira.
Kanaanis tokkummaa jajjabeessuu cinaatti, egereen badhaadhina ummattoota biyya keenyaa misooma waloo irratti kan hundaa’u ta’uu muldhisuu barbaada.
Akkasumas, hojiin ijaarsa biyyaa, obbolummaa sabootaafi ummattoota biyya keenyaa bu’uuraalee misoomaa hidhata hawaas-dinagdee cimsaniin deeggaramuu akka qabu hubachuudhani.
Kaayyoo kana caalmatti milkeessuuf, naannoleen daangaa waliin qooddannu hundi, inni tokko afaan isa biraa qaama akaakuu barnootaa taasisuun barsiisaa jirra.
Manni barumsaa Ifa Boruu Sadarkaa 2ffaa Baaroo, Asoosatti ijoollee Beeniishaangul Gumuziif ijaarree kunis, galmootuma kanniinin kan ibsamuudha.
Dabalataanis, misoomni kilaastara magaalaafi maaddii guutuu magaalaa Asoosaatti daawwanne, kan nama jajjabeessan yoota’u, galma magaalota giddugala omishaafi carraawwanii taasisuuf qabame milkeessuu keessatti gahee olaanaa kan bahuudha.
Walumaagalatti barri kun bara morkii qofa osoo hintaane, bara waltumsuuti.
Mootummaan Naannoo Oromiyaa, hojiilee misoomaafi hawaasummaa hidhata ummattoota keenyaa cimsuu danda’an kamuu Mootummaa Naannoo Beenishaangul Gumuzifi naannolee hafan hunda waliin qindoominaafi tumsa walootiin hojjechuuf yeroo kamuu caalaa qophiidha.
Dhumarrattis, simannaa obbolummaa hoo’aa ummannifi Bulchiinsi Naannoo Beenishaangul Gumuz nuuf taasiftaniif maqaa kiyyaafi maqaa Mootummaa Naannoo Oromiyaatin hedduu galateeffachuun barbaada.
#Oromia #Ethiopia