Finfinnee, Bitootessa 24, 2017 (FMC) – Bitootessi 24 guyyaa seena qabeessa akka biyyaatti gara guddinaatti imaluuf harka walqabannee imala itti eegalleedha jedhan Pireezidaantiin Naannoo Afaar Awwal Arbaan.
Obbo Awwal waggaa 7ffaa guyyaa jijjiirama Biyyaalessaa Bitootessa 24 ilaalchisuun ergaa dabarsaniin, waggoonni jijjiiramaa darban kutaaleen biyyattii hundi akka biyyaatti badhaadhina waloof qormaatilee hedduu injifannoon xumuruun dameelee hedduun milkaa’ina itti galmeessisneedha jedhan.
Dirree siyaasaa bal’isuun fi ogummaa hoggansa imala keenya ariifachiisan hordofuun gara abdii haaraatti ce’uu dandeenyeerra jechuu isaanii ragaan kominikeeshinii naannichaarraa argame ni mul’isa.
Haaromsi hundagaleessi hojiirra oole seenessa qeenxee adeemsa keessa kan dhabamsiise, seenessa waloo jabeessuun Itiyoophiyaa guutuu taate mul’isuun federaalizimiin sabdaneessi akka diriiruuf gargaaruus ibsan.
Maqaa dhiibbataa “gargaartota” jedhuun naannoleen siyaasa giddugaleessaa irraa loogamanii turan abbaa jijiiramichaa ta’uun firii isaa ta’uus eeran.
Pirojeektota eegalaman xumuruu fi tajaajilaaf qopheessuun, naannolee akka Afaar hin misoomin turan qotuun oomishtummaa dabaluun, gama dippiloomaasiin dorgommii fi tumsaan bu’aa galmeessuu danda’uun bu’aalee jijiiramichaa keessaa akka ta’anis himaniiru.