Guyyaan Yaadannoo injifannoo Adwaa 129ffaan guutuu biyyaatti kabajame

Finfinnee, Guraandhala 23, 2017 (FMC) – Guyyaan Yaadannoo Injifannoo Adwaa 129ffaan mata duree ‘Adwaa Injifannoo Ummattoota Gurraachaa’ jedhuun guutuu Itiyoophiyaatti kabajameera.

Sadarkaa biyyaatti ammoo Magaalaa Finfinnee Galma Yaadannoo Injifannoo Adwaatti kabajamee oole.

Pireezidaantiin FDRI Taayyee Atsiqasillaasee, Af Yaa’ii Mana Maree Bakka Bu’oota Ummataa Obbo Taaggasee Caafoo, Af Yaa’ii Mana Maree Federeeshinii Obbo Aganyaw Tashaagar, Ministiroonni, Qondaaltoonni olaanoon Raayyaa Ittisaa Biyyaa, Ambaasaaddaroonni fi Dippiloomaatoonni saganticharratti hirmaataniiru.

Injifannoon Adwaa Afrikaanoota hunda kan kabachiise, ummattoota Gurraachaa maraaf mallattoo kan ta’e Injifannoo Koloneeffattoota qaanesse ta’uu Pireezidaantiin FDRI Taayyee Atsiqasillaaseen ibsaniiru.

Gootota Adwaarraa duudhaa gootummaa dhaaluun Raayyaa amansiisaa aggaammii diinaa kallattii kamuu qolachuu danda’u ijaaruun danda’amuu Itaamaajoor Shuumiin Waliigalaa Raayyaa Ittisaa Fiild Maarshaal Birhaanuu Juulaan ibsaniiru.

Raayyaan ittisa biyyaa Itiyoophiyaa tokkummaa keessoo kan cimsate, miira jaalala biyyaan kan guutame, ga’umsa loltummaa olaanaa kan goonfate, Raayyaa Onneen sibiilaa ta’uu kaasaniiru.

Tokkummaa keenya eeggachuun qoramaatilee nu mudatan ceenee Itiyoophiyaa fi Afrikaa cimtuu fi badhaatuu ijaaruuf injifannoo Adwaa fayyadamuu qabna jedhan Ministirri Ministeera Raayyaa Ittisaa Injinar Ayishaa Mahaammad.

Pireezidaantiin Waldaa Gootota Durii Lij Daani’een Jooteen gama isaaniin Adwaan Injifannoo Afrikaanootaa fi Ummattoota Gurraachoota hunda kabachiise, injifannoo addaa ta’uu ergaa dabarsaniin himaniiru.

Injifannoon Adwaa yaadama ni danda’amaa uummattoota gurraachaa kan dhugoomse ta’uu, Dura taa’aan duraanii Komishiinii Gamtaa Afrikaa Muusaa Faakii Mahammat eeraniiru.

Guyyaan Yaadannoo injifannoo Adwaa 129ffaan kun Embaasiiwwanii fi Qoonsilaawwan Itiyoophiyaa biyyoota adda addaatti argamanittis sirnoota adda addaan kabajameera.

#Oromia #Ethiopia

Comments (0)
Add Comment