Finfinnee, Guraandhala 24, 2017 (FMC) – Hojii olaantummaa seeraa mirkaneessuu fi hojimaata badaa hambisuuf hojjetameen hoggantootaa fi hojjettoota dhaabbatichaa 22 irratti tarkaanfiin fudhatamuu Tajaajilli Elektirikaa Itiyoophiyaa beeksise.
Tarkaanfichi kan fudhatame eeruu hojimaata badaa fi malaammaltummaa hawaasni kenne bu’uura godhachuun ta’uu dhaabbatichi Faanaa Diijitaaliif ibseera.
Bu’uuruma Kanaan hojiin dhimmicha qulqulleessuu erga hojjetameen booda namoota 3 akeekkachiisa barreeffamaan, namoota 19 ammoo adabbii miindaan adabamuu eerameera.
Gama biraan baatiiwwan torban darbanitti gochi yakka hannaa fi mancaatii qabeenyaa humna ibsaa, tiraanisfoormerii, sarara daddabarsa elektirikaa, haada elektirikaa fi kanneen biroo irratti raawwachuu ibsameera.
Miidhaan gama Kanaan qaqqabes Birrii miiliyoona 50 fi kuma dhibba 2 fi kuma 22 olitti kan tilmaamamu ta’uu himameera.
Kanaan walqabtee yakkooonni 163 raawwatamuun hordoffiin irratti taasifamaa akka jiru kan eerame yoo ta’u, kanneen keessaa yakkoota 11 irratti murtoon darbuu ibsameera.
Gama biraan baatiiwwan torban darbanitti maamiltoota kaffaltii tajaajilaa hin kaffaliin hafan 368’f akeekkachiisa kennuun, dhaabbatichaaf galii Birrii miiliyoona dhibba 1 fi miiliyoona 27 fi kuma dhibba 8 fi kuma 40 fi 606.52 argamsiisuun danda’amuu eerameera.
Yohaannis Darribawutu gabaase.
#Oromia #Ethiopia