Finfinnee, Bitootessa 25, 2017 (FMC) –Ijaarsa Warshaa Xaa’oo Itiyoophiyaa galteewwan humna ofiin guutuun damee qonnaaf boqonnaa seenaa haaraa akka fidu Ministirri Ministeera Qonnaa Doktar Girmaa Amanteen ibsan.
Ministirri Muummee FDRI Doktar Abiy Ahimad Mana Maree Bakka Bu’oota Ummataaf ibsa kennaniin, Itiyoophiyaan Warshaa Xaa’oo akka ijaartu kaasuun isaanii ni yaadatama.
Kunis iniisheetiivii olaanaa tattaaffii birmadummaa nyaataa mirkaneessuf taasifamu saffisiisuudha jedhan.
Xaa’oo dabalatee galteewwan biroo humna ofiin oomishuun dhiyeessuun, oomishaa fi omishtummaa guddisuun, galma birmadummaa nyaataa biyyaalessaa milkeessuuf murteessa ta’uu himaniiru.
Makkaanaayizeeshinii qonnaa babal’isuuf fooyyessiin imaammataa taasifamuu eeruun, maashinaroota qonnaa qaraxarraa walaba akka biyya keessa galan taasisuun, qonnaan bultootaaf akka dhiyaataa jiru jedhan.
Kana malees, wayita qonna Gannaas lafti hektaarri miiliyoona 20.5 tiraaktaraan qotamuu himan.
Qisaasama oomishaa ittisuu fi oomishtummaa guddisuuf, xiyyeeffannaa kennameen oomishaalee qonnaa kombaayinaraan walitti qabuun baratamaa dhufuu ibsaniiru.
Kunuunsa midhaanii cimsuuf, Awwaannisa, Simbira Girrisaa fi aramaa to’achuuf xiyyaarota keemikaala biifan bituun hojiirra oolfamuu eeruu TOI gabaaseera.