Finfinnee, Bitootessa 10, 2017(FMC) – kaayyoon haaromsa damee barnootaa daa’imman Itiyoophiyaa kamuu barnoota qulqulluu akka argatan dandeessisuu ta’uu Ministirri Ministeera Barnootaa Pirofeesar Biraanuu Naggaa himan.
Ministirichi Waajjirri Ministira Muummee gaaffilee hawaasa irraa dhiyaataniif deebii kennuuf waltajjii qopheesse irratti argamuun ibsaa fi deebii kennaniin, barnoota qulqulluu waliin ga’uun guyyaa tokkoon akka hindhufne fi hojii yeroo gaafatu akka ta’e ibsan.
Garaagarummaan qulqullina barnoota bakka adda addaatti kennamuu bal’achaa yoo dhufe walga’iinsi barnootaa haqa qabeessi jira jechuu akka hin dandeessisne kaasanii, barnoota qulqulluu waliin ga’uuf hojjetamaa akka jiru dubbatan.
Rakkoon qulqullina barnootaa hidda gadi faggeeffatee fi walxaxaa ta’e kana kana furuufis yeroo akka gaafatu himan.
Rakkoolee kanneen adda baasuun kallattii ga’umsa barsiisotaa, bu’uuraalee misoomaa fi sirna barnootaan akkasumas haromsawwan adda addaa geggeessuun sirna barnootichaa fooyyessuuf yaaliiwwan hedduun jiraachuu ibsaniiru.
Garaagarummaan manneen barnootaa Mootummaa fi kan dhuunfaa gidduu jirus yeroo irraa yerootti bal’achaa dhufuu eeranii, kana dhiphisuuf hojjetamaa jira jedhan.
Manneen barnootaa hundi barnoota idileen duraa akka qabaatan ta’uu kan dubbatan Doktar Biraanuun, kunis daa’imman barnoota idilee jalqabuun dura yeroo qophii kennuun garaagarummaa akka fide ibsan
Gama barsiisota leenjisuunis hojii hojjetamaa jiruun ganna darbe qofa barsiisonni kuma 60 fi dursitoota manneen barnootaa kuma 7 leenjisuu akka fakkeenyaatti eeran.
Ganna dhufus barsiisota kuma 84 leenjisuuf karoorfamuu himan.
Faayidaa barsiisotaa ilaalchisees jireenya barsiisotaa jijjiiruuf hojjetamaa akka jiru dubbatan.
Akka fakkeenyaattis bakka mana jireenyaa itti ijaarratan miijessuuf naannoolee waliin dubbatamaa jira jedhan.
Rakkoolee damee barnootaa salphisuuf baankii barsiisotaa hundeessuu dabalatee, dabalata mindaa eeguurra carraa kaka’umsa ofiin galiin dabalataa itti argamu bal’isuuf hojjetamaa jiraachuu eeran.
Hojiiwwan rakkoo naamuusa fi fedhii barnotaa dhabuu barattootaa sirreessuu irratti xiyyeeffatan hojjetamaa akka jiranis himuun, barnooti safuu sirna barnootaa keessa galee kennamaa jiraachuu fakkeenyummaan eeran.
Iyyeerus Warquutu gabaase