Finfinnee, Bitootessa 27, 2017(FMC) – Mootummaan jijjiiramaa Hidha Guddicha Haaromsaa Itiyoophiyaa rakkoo keessaa baasuun boqonnaa xumuraarraan gahuu akka danda’e Ministirri Ministeera Jallisiifi Naannawaa Gammoojjii Dooktar Abrahaam Balaay ibsan.
Dhaabbanni biyya keessaa hojii elektiroo mekaanikaalaa hidhichaa akka hojjetuuf gaafatamummaan itti kenname ture rakkoo gahumsaafi naamuusaa irraa kan ka’e piroojekticha rakkoo keessa galchee turuu yaadachiisaniiru.
Mootummaan jijjiiramaa piroojektichaaf xiyyeeffannoo olaanaa kennuun sadarkaa amma irra jirurraan gahuu eeraniiru.
Dhagaan bu’uuraa isaa wayita kaa’amu piroojekticha waggaa 7 keessatti xumuruuf dhaabbata Xaaliyaanii Saaliinii jedhamu waliin waliigaltteen mallattaa’ee turuus yaadachiisaniiru.
Itti aansuun waggaa lama booda hojiileen elektiroo mekaanikaalaa piroojektichaa dhaabbata hidhicha olaantummaan hojjetu irraa fuudhamee dhaabbata hojii kanarratti muuxannoo hin qabne ‘METEC’f kennamee akka ture kaasaniiru.
Jijjiirama booda gamaaggama gaggeeffameen maddi rakkoo piroojektichaa dhaabbata ‘METEC’ akka ta’e adda bahuu himaniiru.
Rakkoolee kanneen furuun sirna bulchiinsa piroojektichaa sirreessuun, hoggansa jijjiiruuniifi dhaabbilee ijaarsaa gahumsa qaban waliin waliigaltee uumuun hojii bu’aa qabeessi hojjetamuu ibsaniiru.
Hidhicha dhuma bara kanaarratti guutummaan guutuutti xumursiisuuf itti dhiyeenyaan hordoffiin taasifamaa jira jedhan.
Hayilamaariyaam Taganyiin.