Bu’aaleen Bitootessa 24 gandoota Itiyoophiyaa hunda akka gahaniif ni hojjenna- Obbo Tamasgeen Xurunaa

Finfinnee, Bitootessa 2, 2017 (FMC) – Bu’aaleen Bitootessa 24 gandoota Itiyoophiyaa hunda akka gahaniif ciminaan ni hojjenna jedhan Ministirri Muummee Itti aanaan Obbo Tamasgeen Xurunaan.

Obbo Tamasgeen Xurunaan, guyyaa jijjiiramni biyyaalessaa itti dhugoome waggaa 7ffaa ilaalchisuun ergaa dabarsaniiru.

Bitootessi 24 kaleessaafi har’a, har’aafi boru, yaadota fiixeetti bahaniifi giddu jiran, qonnaan bulaafi horsiisee bulaa, nama dhuunfaafi garee, eenyummaa naannawaafi biyyaalessaa yaadama ida’amuun walitti fiduun seenaa Itiyoophiyaa ammayyaa keessatti  guyyaa bakka addaa qabu ta’uu ibsaniiru.

Hojiileen daandii ida’amuun Itiyoophiyaa gara badhaadhinaatti geessuuf eegalaman bu’aa argamsiisuu eegaluu kaasanii, Itiyoophiyaan addunyaarratti bakka isheef malu qabachuuf dhiyaatteetti jedhan.

Hojii gama qamadiin, Ashaaraa Magariisaan, Hidha Guddicha Haaromsa Itiyoophiyaan, bakkeewwan hawwata tuurizimii mijatoon, guddina diinagdee ariifachiisaa galmaa’aa jiruun  Itiyoophiyaan maqaa gaariin waamamaa jiraachuu eeraniiru.

Gama Maaddii Shaggariif, Maaddii Biyyaaf akkasumas Maaddii Dhalootaaf piroojektoonni biyya jijjiiran eegalamanii akka xumuramaniif ‘Idaarraa gara Miindaa’tti imaluuf Bitootessi 24 ka’umsa akka ta’e yaadachiisaniiru.

Inisheetiiviiwwan akka Ashaaraa Magariisaa, Maaddii Guutuu, Wabii Nyaataa , Sagantaa Nyaataa Barattootaafi Misoomni Kooriidarii bu’aalee Bitootessa 24 ta’uu eeraniiru.

Bu’aalee Bitootessa 24 kanneen kunuunsuufi babal’isuu qofa osoo hin taane xaddeefi yeeyyiirraa ittisuu qabna, eenyuyyuu galma keenyarraa duubatti nun deebisu jedhaniiru.

#Oromia #Ethiopia