Dooktar Alamuu Simeen Miseensa Boordii Fandii Nageenya Daandii Mootummoota Gamtoomanii ta’an

Itiyoophiyaan tarsiimoo biyyaalessaa nageenya daandii bocuun, nageenya daandii sirna barnootaa keessaa galchuun tarkaanfiileen fudhachaa jirtuu fi murannoon nageenya daandii mirkaneessuuf qabdu agarsiiftuu ta’uun xalayaa muudama Dooktar Alamuu Simeef barreeffameen eerameera.

Pirojektiwwan misooma koriidariin ijaaraman daandiilee biskileetii fi namaa akkasumas hojiilee walitti hidhamiinsa daandiilee foyya’aniifi akka biyyaatti qindoomina bu’uuraalee misooma geejjibaa kan guddisan ta’uun ibsameera.

Komishiniin Diinagdee Afrikaa murannoo Itiyoophiyaan nageenya daandiif qabdu hubachuun beekamtii kennuun Dooktar Alamuu Simeen Miseensa Boordii Fandii Nageenya Daandii Mootummoota Gamtomanii ta’uun muudamuu beeksiseera.

Dooktar Alamuun Miseensa Boordichaa ta’uun, Itiyoophiyaan muuxannoo qabdu biyyoota biroof akka qooduu fi biyyoota Addunyaarra immo muxannoo foyyaa’aa akka argattuuf carraa kan uumu ta’uu ragaan Ministeera Geejjibaa fi Loojistiksiirraa argame ni mul’isa.