Dudhaalee hawaasummaa Itiyoophiyaan qabdu keessaa Ayyaanni Shuwaaliid tokko- Salaamaawit Kaasaa

Finfinnee, Bitootessa 27, 2017(FMC) – Dudhaalee hawaasummaa Itiyoophiyaan qabdu keessaa Ayyaanni Shuwaaliid tokko ta’uu Ministirri Ministeera Tuurizimii Salaamaawit Kaasaan ibsan.

Salaamaawit Kaasaan ergaa miidiyaa hawaasummaa isaaniin dabarsaniin, baga Ayyaana Shuwaaliidiin nagaan geessan jedhaniiru.

Ayyaanni Shuwaaliid faaya Harar ta’uu kaasanii, ayyaanichi saba Hararii biratti waggoottaniif kabajamaa kan tureefi dudhaa isaa eeggatee dhalootaa dhalootatti darbaa kan dhufe ta’uu ibsaniiru.

Ayyaanichi hariiroo hawaasummaafi diinagdee cimsuurra darbee dudhaalee beeksisuu akka dandeessisus eeraniiru.

Dabalataan  ayyaanichi qabeenya aadaa, hambaafi tuurizimii eeguun, kunuunsuuniifi misoomsuun tattaaffii faayidaa hunda galeessa damicharraa argamuu danda’u fayyadamuuf taasifamu akka deeggaru kaasaniiru.

Hojii mootummaan naannichaa hambaa idil-addunyaa Jagool misoomsuun jiraattotaafi daawwattootaaf mijataa akka ta’uuf hojjete kan dinqisiifatamu ta’uus eeraniiru.