Guddina diinagdee Itiyoophiyaa itti fufsiisuuf dameen geejjibaa gahee olaanaa qaba- Dooktar Alamuu Simee

Finfinnee, Bitootessa 23, 2017 (FMC) – Guddina diinagdee Itiyoophiyaa itti fufsiisuuf dameen geejjibaa gahee olaanaa qabaachuu Ministirri Ministeera Geejjibaafi Loojistiksii Dooktar Alamuu Simeen ibsan.

Bulchiinsi magaalaa Finfinnee Awutoobisiiwwan ammayyaa elektirikiin hojjetan 100 guyyaa har’aa hojii eegalchiiseera.

Dooktar Alamuu Simeen saganticharratti  haasawaa taasisaniin, Bulchiinsi Magaalaa Finfinnee tajaajila geejjibaa si’eessuu keessatti hojii fakkeenya ta’u hojjechaa akka jiru dubbataniiru.

Bulchiinsi magaalichaa rakkoo damee Kanaan jiru furuuf hojiilee hedduu hojjechaa jiraachuu eeranii, daandiiwwan babal’achaa, daandii konkolaattotaafi imaltoota miillaa adda bahaa, daandiiwwan haaraan ijaaramaa jiraachuufi hawaasaaf filmaatawwan geejjibaa dhiyaachaa jiru jedhan.

Awutoobisiiwwan guyyaa har’aa gara hojiitti galan diinagdee magariisaaf mijatoo kan ta’aniifi imaammata konkolaattota anniisaa haaromfamaa fayyadaman hojiirra oolchuuf bahe gara hojiitti galuu isaaf agarsiistuudha jechuu isaanii ragaan Waajjira Kantiibaa Magaalaa Finfinneerraa argame ni mul’isa.