Haangaariin Mana Murtii Yakkaa Idil-addunyaa keessaa baate

Finfinnee, Bitootessa 25, 2017 (FMC) –Haangaariin Mana Murtii Yakkaa Idil-addunyaa (ICC) keessaa bahuu ishee beeksiste.

Murteen Haangaarii kun erga muummichi ministeeraa Haangaarii Viktor Orbaan gita isaanii Israa’el Beeniyaamin Netaaniyaahuu kan ICCn yakka waraanaatiin himate waliin wal arganii booda akka ta’e himama.

Manni murtii yakkaa idil-addunyaa kanaan dura muummicha ministeeraa Beeniyaamin Netaaniyaahuu fi hogganaa Raayyaa Ittisa Israa’el duraanii Yo’aav Gaalaanti yeroo Israa’el Hamaas waliin wal waraanuu hordofee yakka waraanaatiin himate.

Murtiin kun hoggantoonni  lamaan bakka kamittuu akka hidhamanis kan ajaju yoo ta’u, dhaabbatichi murtiin kun biyyoota miseensa isaa ta’an 125 keessatti akka raawwatamu ajajeera.

Haa ta’u malee, hundeessituu fi miseensa Mana Murtichaa kan taate Haangaariin ajaja kana mormuun, muummicha ministeera Israa’el Beeniyaamin Netaaniyaahuu gara biyya isaaniitti affeeruun dhimma biyyoota lamaanii irratti mari’ataniiru.

Kanaan dura Haangaariin muummicha ministeeraa Beeniyaamin Netaaniyaahuuf eegumsa ni kenniti kan jedhan Viiktor Orbaan murtee Mana Murtii Yakkaa Idil-addunyaa hojiirra akka hin oolchines himanii turan.

Har’a Haangaariin Mana Murtii Yakkaa Idil-addunyaa keessaa ifatti bahuu ishee Ministirri Waajjira Ministira Muummee Giriigoor Gulyaas beeksisuu BBC fi Aljaziiraan gabaasaniiru.

#Oromia #Ethiopia