Hanga ammaatti Xaa’oo kuntaalli miliyoona 5.5 naannoleetti geejjibsiifameera-Ministeera Qonnaa

Finfinnee, Guraandhala 11, 2017 (FMC)- Hanga ammaatti Xaa’oon kuntaalli miliyoona 5.5 naannoleetti geejjibsiifamuu Ministeerri Qonnaa beeksise.

Ministir Deetaan Ministeerichaa Dooktar Soofiyaa Kaasaan Faanaa Miidiyaa Koorporeeshiniif akka ibsanitti, bara baajataa kana xaa’oo biyyee kuntaalaa miliyoona 24 bituuf karoorfameera.

Hanga ammaattis xaa’oon kuntaalli miliyoona 7 Buufata Doonii Jibuutii qaqqabuu fi kuntaalli miliyoona 5.5 ammoo naannolee biyyatti garaagaraatti geejjibsiifamuu ibsaniiru.

Kanaan dura dhiyeessii fi raabsaa xaa’oo irratti hanqinaalee mul’atan furuuf Naannoo Hararii fi Bulchiinsa Magaalaa Dirree Dhawaa malee naannoleen hunduu bittaa xaa’oo keessa akka galanii fi abbootiin qabeenyaa ammoo naannoo misoomsanitti xaa’oo akka argatan taasifamuu ibsaniiru.

Dabalataan hanqinaalee raabsaa xaa’oorratti mul’atan furuuf bara kana hojmaanni dijitaalawaan akka eegalamu qophiin taasifamaa jiraachuu himaniiru.

Masaafinti Iyyaayyuutu gabaase.

#Oromia #Ethiopia