Hawaasni Musliimaa dhimmoota biyyaarratti gahee isaanii bahachuu qabu-Mana Marichaa
Finfinnee, Guraandhala 6, 2017 (FBC)- Hawaasni Musliimaa, dhimmoota biyyaa gama siyaas-diinagdee fi hawaasummaan gahee isaanii bahachuu akka qaban Manni Maree Olaanaa Dhimmoota Islaamummaa Magaalaa Finfinnee ibse.
Manni marichaa simannaa ji’a Ramadaanaa ilaalchisuun konfiraansii idilee 2ffaa sheekotaa, ulamootaa fi imaamotaa gaggeessaa jira.
Saganticha irrattis, Pireezidaantii Mana Maree Waliigalaa Dhimmoota Islaamummaa Itiyoophiyaa Sheek Haji Ibraahim Tufaa, Pireezdaantii Mana Maree Dhimmoota Islaamummaa Magaalaa Finfinnee Sheek Sulxaan Amaan dabalatee abbootiin amantii fi keessummoonni biroon argamaniiru.
Waltajjicharratti, Sheek Haji Ibraahim Tufaa haasawaa taasisaniin, hawaasni musliimaa gama maraan nageenya naannoo fi biyya isaa eegsisuu akka qabu dhaamaniiru.
Ji’a Ramadaanaa dhufaa jiru simannee soomuu kan dandeenyu nageenyi yoo jiraate qofa kan jedhan Sheek Hajiin nageenyi biyyaa akka eegamu dirqama amantichi ajaju bahachuun barbaachisaa ta’uu himaniiru.
Sheek Sulxaan Amaan gama isaaniin, hawaasni Musliimaa, dhimmoota biyyaa gama siyaas-diinagdee fi hawaasummaan akkasumas nageenya biyyaa eegsisuu keessatti gahee isaanii bahachuu qaba jedhaniiru.
Kana malees, ji’a Ramadaanaa dhufaa jiru simachuuf qophii barbaachisaa taasisuu qaba himaniiru.
Hawaasni musliimaa akkuma barsiifata amantichaa fi duudhaa amantichaa keessa jiruun harka qalleeyyii deeggarsa barbaadan iyyaafachuun bira dhaabbachuun, ji’icha gammachuun akka simatan taasisuu qaba jedhaniiru.
Rahmaa Ahmaditu gabaase.
#Oromia #Ethiopia