Hirmaannaa fi fayyadamummaa dubartootaa mirkaneessuuf mootummaan tarsiimoo bocee hojjetaa jira- Dooktar Ergoggee Tasfaayee

Finfinnee, Guraandhala 13, 2017 (FMC)- Hirmaannaa fi fayyadamummaa dubartootaa hundagaleessa mirkaneessuuf mootummaan tarsiimoowwan adda addaa bocee hojjechaa jiraachuu Ministeerri Dhimma Dubartootaa fi Hawaasummaa Dooktar Ergoggee Tasfaayee ibsan.

Akkaadaamiin Hoggansa Afrikaa marsaa jalqabaan dubartoota sagantaa misooma hoggansa dubartootaan leenjise eebbisiiseera.
Ministirri Ministeerichaa Doktar Ergooggee Tasfaayee sirnicha irratti akka dubbatanitti, dubartoota barsiisuu fi ga’oomsuun maatii barsiisuu akkasumas biyya jijjiiruudha.

Biyyi tokko dinagdee, hawaasummaa, fi siyaasaan sadarkaa gaariirra akka geessuuf humnaa fi dandeettii dubartootaa fayyadamuun murteessaa dha kan jedhan Doktar Ergoogeen, mootummaan hirmaannaa fi fayyadamummaa dubartootaa hundagaleessa mirkaneessuuf tarsiimoowwan adda addaa bocee hojjetaa akka jiru ibsaniiru.

Ministeerichi karoora waggoota 10 keessatti hojiiwwan fayyadamummaa dubartootaa mirkaneessan hojjetaa jiraachuus ibsanii, leenjiin akkanaas qaama karoorichaati jedhan.

Eebbifamtoonnis, beekumsaa fi ogummaa leenjicharraa argatan hojiitti akka hiikan hubachiisaniiru.

Pireezidaantiin Akkaadaamii Hoggansa Afrikaa Zaadig Abrahaa gama isaaniin, gahee hoggansaa fi hirmaannaa dubartootaa guddisuuf hirmaannaa hundaa akka gaafatu dubbataniiru.

Akkaadaamichi geggeessitoota ga’umsa qaban horachuuf hojjechaa jiraachuu ibsanii, dandeettii hoggansaa dubartootaa cimsuuf Faawundeeshinii Biilii fi Meliindaa Geetis walta’uun leenjii walfakkaataa kennaa jiraachuu eeruu TOI gabaaseera.

#Oromia #Ethiopia