Hojiileen ce’umsa diijitaalaa guddina diinagdeef bu’uura kaa’an hojjetamuu ibsame

Finfinnee, Guraandhala 21, 2017 (FMC) – Hojiileen ce’umsa diijitaalaa guddina diinagdee Itiyoophiyaaf bu’uura kaa’an hojjetamuu Ministeerri Innooveeshiniifi Teeknooloojii beeksise.

Yaa’iin ministeerichi Eekisteensiyaa waliin ta’uu teeknooloojii, hubannoo nam-tolchee fi bulchiinsa diijitaalaa irratti guyyoota lamaaf gaggeessaa ture xumuramuu eerameera.

Yaa’icharratti hirmaattonni biyyoota Afrikaa garaagaraa 300 ol qooda fudhachu kan ibsame yoo ta’u, dhimmoota Afrikaatti hojiirra oolmaa ce’umsa diijitaalaa si’eessuu dandeessisan irratti kan xiyyeeffate ta’uun ibsameera.

Itiyoophiyaan imaammata ijaarsa bu’uuraalee misoomaa diijitaalaa fi hubannoo nam-tolchee gara fuula duraatti tarkaanfachiisuu danda’an bocuun hojjechaa jiraachuu eerameera.

Dameewwan diinagdee diijitaalaan carraawwan haaraa fiduuf hojiileen ijaarsa hubannoo nam-tolcheen, Istaartaappii fi bu’uuraalee misoomaa ICT’n hojjetaman guddina diinagdeef bu’uura kan kaa’an ta’uu ibsamuu ragaan Ministeericharraa argame ni mul’isa.