Hojiin misooma Sululaa jijjiirama qabatamaa argamsiisaa jira – BQO

Finfinnee, Guraandhala 13, 2017 (FMC) – Hojiin misooma Sululaa jijjiirama qabatamaa argamsiisaa jiraachuu Biiroon Qonnaa Oromiyaa beeksise.

Bara kana Amajjii 15, 2017 eegalee lafa hektaara miiliyoona 1.3 irratti Sululoota kuma 6 fi 465 misoomsuuf hojjetamaa jiraachuu Biiroo Qonnaa Oromiyaatti Daayrekterri Misooma Sululaa fi Eegumsa Biyyoo fi Bishaanii Obbo Geetaachoo Kabbadaan ibsaniiru.

Gama hirmaannaa uummataanis hanga ammaatti namoonni miiliyoonni 7 fi kumni 200 fi kumni 35 ol hojii misooma Sululaa kanarratti hirmaachaa jiraachuu kaasaniiru.

Sululoota kuma 6 fi 465 misoomsuuf karoorfaman keessaa hanga ammaatti sululoonni kumni 5 fi 738 misoomuus dubbataniiru.

Raawwiin waliigalaa hanga ammaas % 38 irra gahuus himaniiru.

Hojiiwwan misooma Sululaa Godinaalee Harargee lamaan, Arsii, Jimmaa fi Buunnoo Beddelleetti hojjetamaa jiran ammoo godinaalee biroof fakkeenya gaarii ta’uu kan danda’aniidha jedhan Obbo Geetaachoon.

Hojiin misooma Sululaa hojii idilee ta’uun itti fufiinsaan akka hojjetamu labsiin qophaa’ee hojiitti galamuus ibsaniiru.

Waggoottan shanan darban keessaa hojii hojjetameenis jijjiiramni qabatamaan argamuu himaniiru.

Hojii kanaan bosonni manca’ee fi harri gogee ture deebi’uu kan ibsan obbo Geetaachoon , dhiqama biyyoo ittisuun biyyoon haphatee tures gabbachaa jiraachuu eeraniiru.

Kana malees qilleensi oomishaaf mijataa ta’e uumamuu irraa kan ka’e aadaan qonnaa jijjiiramuun waggaatti yeroo sadii oomishuun danda’ameera jedhan.

Lafa tuttuqaarraa daangeffame keessatti hojiin Kanniinsa Horsiisuu fi loon Furdisuun bal’inaan hojjetamaa akka jiru ibsaniiru.

Gurgurtaan Kaarbanii bosona deebi’ee misoomaa jiru irraa argamus madda galii biyyaa ta’aa jiraachuu dubbataniiru.

Siifan Magarsaatu gabaase.

#Oromia #Ethiopia