Injifannoon Adwaa miira waloo Seenessa Waloof bu’uura kaa’edha-Afyaa’ii Aganyahu Tashaagar

Finfinnee, Guraandhala 22, 2017 (FMC) – Injifannoon Adwaa miira waloo Seenessa Waloof bu’uura kaa’edha jedhan Afyaa’iin Mana Maree Federeeshinii Obbo Aganyahu Tashaagar.
Obbo Aganyahu Tashaagar guyyaa yaadannoo injifannoo Adwaa 129ffaa sababeeffachuun ergaa baga geessanii dabarsaniiru.
Ergaa isaaniin, injifannoon Adwaa miira waloo Seenessa Waloof bu’uura kaa’e ta’uu ibsaniiru.
Injifannoon Adwaa bu’aa kaayyoo tokkoof cichoominaafi tokkummaan dhaabbachuu ta’uu ibsuun, Itiyoophiyaanonni tokkummaa biyyaarratti eenyu waliinuu mariif kan hin teenye, wanta itti amanan irraa duubatti kan hin deebine ta’uu isaanii ifatti kan mul’ise; Ayyaana tokkummaa Itiyoophiyaa ta’uu kaasaniiru.
Injifannoon Adwaa waliif yaaduu, wal kabajuu, wal dhaggeeffachuu fi miira biyyaalessaa kan barsiisu ta’uu eeraniiru.
Itiyoophiyaanonni sabaan, amantiin, aadaan, afaanii fi ilaalchaan osoo hin qoqqoodamiin tokkummaan duuluu ibsuun, duudhaa waloo biyyaalessaati jedhan.
Duudhaalee waloo addunyaaf fakkeenya ta’aa dhufe kana dhaloota dhufuuf dabarsuu qabna jechuusaanii ragaan Mana Maree Federeeshiniirraa argame ni mul’isa.
#Oromia #Ethiopia