Itiyoophiyaan “Yaa’ii Idil Addunyaa Jallisii fi Omisha Jijjiirama Qilleensaa Dandamatu” irratti muuxannoo ishee qoodde

Finfinnee, Guraandhala 6, 2017 (FMC)-Ministirri Pilaanii fi Misoomaa Doktar Fitsum Asaffaan “Yaa’ii Idil Addunyaa Jallisii fi Omisha Jijjjiirama Qilleensaa Dandamatu” irratti muuxannoo Itiyoophiyaan misooma waaraa mirkaneessuuf hojjechaa jirturratti ibsa kennaniiru.

Yaa’ii Ministeerri Jallisii fi Naannoowaa Gammoojjii qopheesserratti kan hirmaatan Dooktar Fitsum Asaffaan, Itiyoophiyaan gama misooma waaraa mirkaneessuu fi jijjiirama qilleensaa dandamachuun bu’aa galmeessaa jirtu ibsaniiru.

Itiyoophiyaan Sagantaa Ashaaraa Magariisaa fi eegumsa naannootiin jijjiirama qabatamaa fidaa akka jirtu eeruun, jijjiirama qilleensaa ittisuuf karoora qabatte keessa tokko ta’uu eeraniiru.

Hanga ammaatti biqiltuu biiliyoona 40 dhaabuun, uwwisa bosona biyyattii % 6’n dabaluu eeranii, kanneen keessaa fuduraaleen harka baay’ee ta’uu hubachiisaniiru.

Biyyattiin misooma qamadiin of dandeessee oomishaalee alaa galan hir’isuun wabii nyaataa mirkaneessuuf tattaafachaa jiraachuu ibsaniiru.

Sagantaa Maaddii Guutuu hojiirra oolchaa jirtuun dhiyeessii midhaan nyaataa waliingahuun wabii nyaataa mirkaneessuuf, sochiin geggeeffamaa jiraachuu eeraniiru.

Kun ammo sirna nyaataa qindaa’aa fi cimaa ta’e mirkaneessuuf kan gargaaruun ta’uu dubbataniiru.

Sochiiwwan kunniin Afrikaa irra darbee addunyaaf fakkeenya gaarii akka ta’es himanii, ejjennoo Itiyoophiyaan jijjiirama qilleensaa dandamachuu fi wabii nyaataa mirkaneessuuf qabdu kan agarsiisu ta’uu ibsuu ragaan ministeericharraa argame ni mul’isa.

#Oromia #Ethiopia