Itiyoophiyaatti tajaajilli Ambulaansii Qilleensarra eegaluuf jedhame

Finfinnee, Amajjii 19, 2017 (FMC)– Itiyoophiyaatti Tajaajila Ambulaansii qilleensarraa eegaluuf qophiin taasifamaa jiraachuu Ministeerri Fayyaa beeksise.

Tajaajilicha eegaluuf qophiin taasifamaa jiraachuu Ministeera Fayyaatti Hojii Gaggeessaan Tajaajila Fayyaa Dooktar Iluubaaboor Bunnoo Faanaa Miidiyaa Korpooreeshiniif ibsaniiru.

Ministeerri Maallaqaa, Humni Qillensa Itiyoophiyaa fi Daandiin Qilleensaa deeggarsa barbaachiisu taasisaa jiraachuu fi adeemsichis haala gaariirra jiraachuu dubbataniiru.

Marsaa jalqabaan wal’aansa biyya keessaaf heelikooptara tokko, tajaajila wal’aansa biyya alaaf immoo Ambulaansii xiyyaara qilleensarraa bituuf karoorfamuu himuun,Heelikooptarri bara kana bituun bara dhufutti tajaajila kennuuf ta’uu himaniiru.

Taajajilichi galteewwanii fi ogeeyyii fayyaa daqiiqaa muraasa keessatti qaqqabsisuuf kan deeggaruu ta’uunis ibsameera.

Masaafinti Iyyaayyuutu gabaase.