Komishinichi dhiibbaa uumtota waliin Magaalaa Adaamaatti mari’achaa jira

Finfinnee, Mudde 12, 2017 (FMC) – Komishiniin Maree Biyyaaleessaa qaamoole dhageettii hawaasaa qabaniifi dhiibbaa uumuu danda’an waliin Magaalaa Adaamaatti mari’achaa jira.

Bakka buutoonni Paartilee siyaasaa, Abbootiin Gadaa, Abbooti Amantaa, Hayyoonni,Roggeeyyii fi qaamolee dhiibbaa uumaan hirmaachaa jiru.

Komishinichi walhubannaa, wal amantaa, fudhatamummaa fi ijaarsa sirna diimookraasiif biyyaa cimsuuf hojjechaa jiraachuu Komishinarri Itti Aantuu Olaantuun Komishinichaa Hiruut G/Sillaase himaniiru.

Paartilee siyaasaa fedhii marii qabanifi qooda fudhatoota waliin mari’achuun garaa garummaa yaadaafi ilaalchoota siyaasaa mul’atan irratti waligaltee biyyaalessaa uumuuf hojjetamaa jiraachuu kaasaniiru.

Komishinichi aadaa siyaasaa fooyya’aa ijaaruun waliigaltee biyyaaleessaa cimsuu fi wal amantaa ummataafi mootummaa caalmaatti mariin gabbisuuf hojjechaa jira jedhan.

Milkaa’ina marichaaf tola ooltoota, dargaggoota fi dhabbilee idil addunyaa waliin tumsaan hojjetamaa jiraachuus kaasaniiru.

Komishinichi marii hojii ajandaa adda baasuu naannolee 10fi bulchiinsa magaalootaa lama keessatti aanaalee 971 irratti gaggeessuu ibsaniiru.

Kutaalee hawaasaa kuma 100 fi kuma 5 ol marisiisuun danda’amu himaniiru.

Sadarkaa naannoo Oromiyaatti mariin ajandaa adda baasuu kutaalee hawaasaa kuma 7 ol hirmaachise bakka bu’oota qooda fudhatoota waliin mari’atan 320 filachuun kaleessa kan xumurame yoo ta’u guyyaa har’aas qaamolee dhiibbaa uumtoota waliin mari’achaa jira.

Boru mariin qaamolee qooda fudhatoota waliin kan gaggeeffamu ta’a jedhamee eeggama.

Muluu Waaqshumeetu gabaase.

#Oromia #Ethiopia