Komishiniin Gumruukaa Itiyoophiyaa fi Ejensiin Gumruukaa  Xaaliyaanii tumsaan akka hojjetan ibsan

Finfinnee, Guraandhala 27, 2017 (FMC)- Komishiniin Gumruukaa Itiyoophiyaa fi Ejensiin Gumruukaa Xaaliyaanii tajaajila gumruukaa hariiroo daldalaa biyyoota lameenii madaalu kennuuf tumsaan kan hojjetan ta’uu ibsan.

Komishinarri Komishinii Gumruukaa Itiyoophiyaa Dabalee Qaabataan, Daayrektara Jeneraalaa  Hariiroo Alaa Ejensii Gumruukaa Xaaliyaanii Andiriyaa Maaziilaa fi Gumruuka Xaaliyaaniitti Itti Gaafatamaa Dhimmoota Gumruukaa Awurooppaa fi Idil-addunyaa Raafaa’el Kaapu’aanoo waliin mari’ataniiru.

Mariisaaniin, haala biyyoonni lameen waliin hojjechuu danda’anirratti mari’achuu ragaan Komishinii Gumruukaarraa argame ni mul’isa.

Tajaajilli gumruukaa tajaajila idil-addunyaa biyyoota hedduu walitti hidhu ta’uu fi guddina damichaaf qindoominni biyyootaa murteessaa akka ta’e eerameera.

Sochiin daldalaa idil-addunyaa amala jijijjiiramaa waan qabuuf tajaajila  haala kana ilaalcha keessa galche kennuuf dhaabbileen gumruukaa cimuu qabu jedhame.

Dhaabbileen gumruukaa biyyoota lameenii tajaajila gumruukaa  hariiroo daldalaa Itiyoophiyaa fi Xaaliyaanii madaalu kennuuf walitti dhiyeenyaan kan hojjetan ta’uu ibsameera.

Dabalataanis haala dhaabbileen lameen teeknooloojii fi ijaarsa dandeettii irratti muuxannoo qaban waliif qooduun danda’amu uumuuf kan hojjetan ta’uun eerameera.

#Oromia #Ethiopia