Kutaa Magaalaa Malkaa Noonnootti Ijaarsi Pirojektii Gaaddisa Mana Murtii Aadaa eegale

Finfinnee, Bitootessa 7, 2017(FMC) – Magaalaa Shaggar Kutaa magaalaa malkaa Noonnootti ijaarsi pirojektii Gaaddisa Mana Murtii Ol dabarfataa eegaluun ibsame.

Magaalaan Shaggar galma hundeeffama ishee bu’uureffachuun hojiiwwan aadaa, duudhaa fi eenyummaa sabichaa calaqqisiisanii fi diinagdee magaalichaa tumsan eegalaman xiyyeeffannoo hojjetamaa jiraachuu Kantiibaan magaaalichaa Dooktar tashoomaa Addunyaan ibsan.

Magaalaan Shaggar cabiinsa aadaa fi eenyummaa naannichatti kanaan dura ture furuuf kan hundaa’e ta’uu himuun, ijaarsi mana murtii ol-dabarfataa kunis galma magaalichaa kan bu’uureffate ta’uus himaniiru.

Saganticharrattis, Sadarkaa Itti Aanaa Pireezidaantii Mootummaa Naannoo Oromiyaatti Kantiibaan Bulchiinsa Magaalaa Shaggar Dooktar Tashoomaa Addunyaa, Itti Gaafatamaa Waajjira Paartii Badhaadhinaa Damee Magaalaa Shaggar Obbo Alamaayyoo Tulluu, Abbootii Gadaa fi Haadholiin Siinqee akkasumas qondaaltonni magaalichaa biroon argamuu ragaan Kominikeeshinii Magaalichaarra argame ni mul’isa.