Magaalaa Walisootti Sagantaan eegalchiisa ijaarsa Mana Barumsaa Bultii Addaa Ifa Boruu gaggeeffame
Finfinnee, Amajjii 15,2017 (FMC)- Godina Shawaa Kibba Lixaa Magaalaa Walisootti sagantaan eegalchiisa ijaarsa Mana Barumsaa Bultii Addaa Ifa Boruu sadarkaa 2ffaa gaggeeffameera.
Saganticharratti Ministirri Ministeera Barnootaa Piroofeesar Birhaanuu Naggaa ,Hoogganaa Biiroo Barnoota Oromiyaa Dooktar Tolaa Bariisoo fi qondaaltoonni Naannoo fi Godinichaa biroon argamaniiru.
Ijaarsi Mana barumsaa Ifa boruu bultii addaa Walisoo kun baajataa mootummaa Birrii Biiliyoona 1.2’n dhaabbata ijaarsaa Mootummaa ‘OBM’ jedhamuun kan ijaaramu ta’un ibsameera.
Manni Barumsicha barattoonni qaxalee Naannoolee garaagaraa biyyatti keessaa dorgomuun kan itti baratan ta’uun isaa kan adda isa taasisa jedhameera.
Mootummaan Naannoo Oromiyaa barnootaaf dursa kennee xiyyeeffannoon hojjechaa jiraachuu Dooktar Tolaa Bariisoon ibsaniiru.
Manni Barumsaa Ifa Boruu Bultii Addaa Walisoo kun yeroo gabaaba keessatti xumuruun hojii baruufi barsiisuu kan eegalu ta’uunis ibsameera.
Tsahaay Gulummaatu gabaase.