Manni marichaa Wixinee Labsii Hoggansa Sodaa Balaa qorachuun Koree dhaabbii ilaallatutti dabarse

Finfinnee, Bitootessa 9, 2017(FMC) – Manni Maree Bakka Bu’oota Uummataa Wixinee Labsii Hoggansa Sodaa Balaa Itiyoophiyaa qorachuun koree dhaabbii ilaallatuuf dabarse.

Manni marichaa Walga’ii idilee 20ffaa har’a taa’een wixinee labsii kana erga qo’ateen booda koree dhaabbii ilaallatuuf dabarsuun ibsameera.

Wixinichi hojiilee balaan duraa fi boodaa Hoggansa Sodaa Balaa  Itiyoophiyaa bu’aa qabeessa taasisuuf, dandeettii keessoo dhaabbilee federaalaafi naannolee  ijaaruuf, balaan tasaa yoo uumameefi humnaa ol ta’e sirna labsii yeroo hatattamaa diriirsuu fi hojiirra oolchuuf, akkasumas karoora misooma waaraa fi ijaarsa nageenyaa walitti hidhuuf kan dandeessisu ta’uu mana marichaatti Ministirri Wamamaa Olaanaa Mootummaa Dooktar Tasfaayee Beljigeen ibsaniiru.

Labsicha keessatti danbiiwwan hundeeffama Mana Maree Hoggansa Sodaa Balaa Itiyoophiyaan walqabatan akkasumas hojiifi gaafatamummaa komishinichaa dabalatee dandiiwwan biroon hammatamuu eeraniiru.

Labsichi, labsii Hoggansa Sodaa Balaa Itiyoophiyaa Wixinee Labsii Lakkoofsa 16/2017 ta’uun sagalee guutuun Koree Dhaabbii Dhimmoota Hariiroo Alaa fi Nageenyaaf dabarfameera.

#Oromia #Ethiopia