Milkaa’nni misooma qamadii Itiyoophiyaa Afrikaan nyaatan akka of dandeessu kan barsiisudha-Pir. Taayyee Atsiqasillaasee

Finfinnee, Guraandhala 5, 2017 (FMC)- Milkaa’inni Itiyoophiyaan gama misooma qamadiin galmeessite Afrikaan nyaataan akka of dandeessu agarsiistuu tokko ta’uu Pireezidaantiin FDRI Taayyee Atsqasillaaseen dubbatan.

Yaa’ii misooma jal’isii fi jijjiirama qilleensaa Magaalaa Finfinneetti taa’amaa jirurratti haasawaa taasisaniin, rakkoon jijjiirama qilleensaa fi wabii nyaataa dabalaa dhufuu dubbataniiru.

Geggeessummaa Ministira Muummee Dooktar Abiy Ahimadiin, Itiyoophiyaan Afrikaatti ce’umsa misooma qonnaa hawaasa giddugaleeffate dursaa akka jirtus himaniiru.

Hojiiwwan omishtummaa nyaataa jijjiirama qilleensaa dandamatan raawwachaa jiraachuu ishee ibsanii sagantaa Ashaaraa Magariisaa akka fakkeenyaatti eeraniiru.

Sagantaa kanaan biqiloonni biliyoona 40 ol dhaabamuun uwwisa bosonaa guddisuun cinatti misooma kuduraalee fi muduraaleen, lammiileen wabii nyaataa isaanii akka mirkaneeffatan dandeessiseeras jedhan.

Misoomni qamadii Inisheetiivii qonnaa jijjiirama qilleensa dandamatuu ta’uu kaasanii, kanaanis qamadii alaa galu dhaabuun fedhii biyya keessaa ofiin guuttachuu dandeesseetti jedhan.

Kunis Afrikaan ofiin of sooruu danda’uu isheef agarsiistuu tokko ta’uu kaasanii, jal’sii, qonna makkaanaayizeeshinii fi sirnoota misooma qonnaa jijjiirama qilleensaa dandamatanirratti xiyyeeffachuun walabummaa nyaataa ishee ni mirkaneessitis jedhan.

Sagantaa Maaddii Guutuunis oomishaalee aannanii, killee, dammaa fi kanneen biroo wabii midhaan nyaataa sadarkaa maatiitti mirkaneessan hojjechaa akka jirtus ibsaniiru.

Afrikaan humna maaddii ishee guuttachuu dandeessisu qabdi kan jedhan Pireezidaanti Taayyeen, muuxannoon Itiyoophiyaa Ardittiif gahaa ta’uus kaasan.

Afrikaanonni wabii midhaan nyaataa isaanii mirkaneeffachuuf misooma qonnaa, investimentii jal’isii, teeknooloojii fi odeeffannoorratti xiyyeeffachuu akka qabdu dhaamuu TOI gabaaseeera.

#Oromia #Ethiopia