Misoomni Koriidarii Magaalaa Shaggar akka dura jedhameen hojitti hin galle – jiraattota
Finfinnee, Mudde 12, 2017 (FMC) –Hojiin misooma Koriidarii Magaalaa Shaggar baatii sadi dura eegalame saffisa jedhameen hojitti hin galle jechuun jiraattonni magaalichaa komatan.
Jiraattonni kutaa magaalichaa garaagaraa komii misooma Koriidarii magaalicharratti qaban Faanaa Diijitaal Miidiyaaf ibsaniiru.
Baatii sadii dura hojiin diigumsaafi kanneen biroo raawwatamanis isaan alaatti wanti eegalame kan hin jirre ta’uu jiraattonni kutaa magaalaa Furiifi Sabbataa ibsaniiru.
Hojichi akkaataa jedhameen eegaluu dhabuun isaa rakkoof nu saaxilaa jira jedhan.
Daldalttoonni baatii sadi dura misoomaaf kaafaman hanga ammaatti hojiitti osoo hin galin jiraachuu kaasaniiru.
Sababa kanaan jireenya idilee sirnaan itti fufuuf rakkanneedha jedhan.
Jiraattoonni Kutaa Magaalaa Sulultaa, Malkaa Noonnoo fi Buraayyuus rakkoo walfakkaataaf saaxilamuu ibsaniiru.
Misooma koriidarii ni deeggarra, garuu akka saffisaan diigameen hojjetamuu dhabuun isaa rakkoof nu saaxileera jedhan.
Hojiin misooma koriidarii baatii sadi dura eegalame yeroo ammaa xiyyeefannoon hojjetamaa jiraachuu Kantiibaan Bulchiinsa Magaalaa Shaggar Dooktar Tashoomaa Addunyaan Faanaa Dijiitaal Miidiyaaf himaniiru.
Hojiin Dizzaayinii hundi xumuramuu Dooktar Tashoomaan ibsaniiru.
Hojiin sarara Humna Elektirikaa Bakka jijjiruu, Kebila Teeleekoomii diriirsuu fi kanneen biroon walqabataan hojjetamaa jiraachuu kaasaniiru.
Hojiin Misooma Koriidarii kun yeroo dhiyootti guutuumman guutuutti kan eegalamu ta’uu ibsaniiru.
Tsahaay Gulummaatu gabaase.
#Oromia #Ethiopia