Naannawichatti uwwisa waljijjiirraa interneetii babal’isuun bu’aa galmeessuun barbaachisaadha jedhame
Finfinnee, Amajjii 16, 2017 (FMC) – Biyyoota miseensa Dhaabbata Misoomaa Mootummoota Baha Afrikaa ta’an gidduutti uwwisa waljijjiiraa interneetii babal’isuun bu’aalee haarawaa galmeessuun akka barbaachisu Ministeerri Teeknooloojii fi Innooveeshinii beeksise.
Konfiraansiin Misooma Interneetii bara 2025 naannawa baha Afrikaatti hudhaalee bu’uuraalee misoomaa furuu fi furmaatilee jiran hojiirra oolchuu irratti xiyyeeffate gaggeeffameera.
Miseensota gamtichaa gidduutti uwwisa waljijjiirraa interneetii babal’isuu, qabeenyaa fi beekumsa waliin fayyadamuun bu’aawwan galmeessuun akka barbaachisaa Ministir Deetaan Ministeerichaa Dooktar Yishuruun Alamaayyoo dubbataniiru.
Biyyoonni Miseensa gamtichaa imammatootaa fi tarsiimoolee waliinii baafachuun invastimeentiiwwan bu’uuraalee misooma dijiitaalawaa akka guddifataniif gargaaras jedhan.
Daayrekteerri olaanaan Abbaa Taayitaa komunikeeshinii Itiyoophiyaa Baalchaa Reebaan gama isaaniin, biyyoonni miseensota dhaabbatichaa guddina dinagdee dijiitaalaa ariifachiisuu fi qooda fudhattoota adda duree gabaa dijiitaalaa ta’uuf hojjechuun irraa eegama jedhan.
Humna beekumsaa daangaa walii qooduu guddisuu fi hudhaalee bu’uuraalee misoomaa tumsaan furachuu caalmaatti cimsachuun akka barbaachisu himuu ragaan ministeericha irraa argame ni mul’isa.