Naannoo Tigraayitti gaaffiiwwan misoomaa uummatni kaasu deebisuuf xiyyeeffannaan hojjetamaa jira jedhame

Finfinnee, Amajjii 25, 2017 (FMC) – Nageenya Naannoo Tigraayitti argame waaressuu fi gaaffiiwwan misoomaa uummatni kaasu deebisuuf xiyyeeffannaan hojjetamaa jiraachuu Bulchiinsi yeroo naannichaa beeksiseera.

Manni Maree Gorsaa miseensota hoggantoota bulchiinsa yeroo, waldaalee siivikii fi hoggantoota nageenyaa of keessatti qabate har’a hundaa’eera.

Nageenya naannichatti argame itti fufsiisuun gaaffiiwwan misoomaa uummatichaa deebisuuf xiyyeeffannaan kennamee hojjetamaa jiraachuu Pireezidaantiin Bulchiinsa yeroo Naannichaa Obbo Geetaachoo Raddaan ibsaniiru.

Hojiileen eegalman akka milkaa’aniif hayyoonni, dargaggoonni, waldaaleen siivikii fi paartileen siyaasaa qooda isaanii akka ba’an dhaamaniiru.

Manni maree gorsaa har’a hundaa’e rakkoolee naannichaa furuu keessatti qooda olaanaa qabaachuu ibsaniiru.

Dhaabbata yaadawwan fi ilaalchota gama hundaan jiran ija walqixaan keessummeessu akka ta’ee eeran.

Dhaabbilee hirmaannaa uummatichaa dhugoomsan ijaaruun xiyyeeffannaa argachuu qaba kan jedhan Pireezidaantichi manni marichaa sochii siyaasaa naannichaaf bu’uura akka kaa’u abdii qabaachuu dubbataniiru.

Waltajjicharratti dura taa’aa fi dura taa’aa itti aanaan filatamuus TOI gabaaseera.

#0romiyaa #Ethiopia