Oomishaalee sadarkaa gadi ta’an galchuuf jecha tajaajila mootummaa maallaqaan bituun hindanda’amu-Ministeericha

Finfinnee, Guraandhala 14, 2017 (FMC)- Oomishaalee sadarkaa gadi ta’an biyya keessa galchuuf jecha tajaajila mootummaa maallaqaan bituuf yaaluun gonkumaa akka hindanda’amne Ministeerri Daldalaa fi Walitti Hidhamiinsa Naannawaa hubachiise.

Ministeerichi gama miidiyaa hawaasummaa isaan ergaa dabarseen, qulqullinni omishaa ulaagaa sadarkaa kaa’ameen murtaa’a malee maallaqaan hinbitamu jedheera.

Konkolaattota elektirooniksii dabalatee akaakuuwwan oomishaa 13 biyya keessa galfamuun dursee biyyoota oomishnii irraa dhufuutti Dhaabbilee Iispeekshinii Beekkamtii Idl Addunyaa “Cotecna'” fi “Bureau Veritas” jedhamu qaban irraa waraqaa ragaa sakattaa’aa fe’umsaan duraa dhiyeessuu qabu jedheera.

Keessumaa konkolaattota elektirooniksii biyya keessa galfaman ilaalchisee, fichisiistonni biyyoota irraa fichisiisanitti qulqullina isaanii mirkaneessuuf sakattaasisanii waraqaa ragaa sakatta’aa Inispeekshinii fe’umsa duraa qabachuun, Itiyoophiyaa akka galchan hojimaanni taasisu diriirfamee hojiirra oolfamaa jira jedheera.

Ta’us, hojmaata kana darbuun oomishaalee kanneen biyya irraa dhufanitti osoo hintaane Buufata Doonii Jibuutiirraa biyya keessa galchuuf yaaluun nageenyaa fi faayidaa hawaasaa miidha; naannawaas faalamaaf saaxila; diinagdee biyyas kan miidhu ta’uu ministeerichi akeekera.

Gama kanaan ulaagalee duraa kanneen osoo hinguutin buufataalee gumurukaa erga ga’anii warqaan sakatta’aa qulqullinaa kennamuufiin, oomishaaleen isaanii akka biyya keessa galfamu qaamoleen barbaadan rakkoo uumaa jiraachuu ibseera.

Harka micciiruun oomishaaleen sadarkaa gadi ta’an biyya keessa akka galfamaniif tajaajila mootummaa maallaqaan bituuf yaaluun gonkumaa akka hindanda’ame hubachiiseera.

Alaa fichisiistonni kamuu gochaalee seeran alaa biyyaa fi ummata miidhan irraa akka of qoqqobanii fi hojmaataa diriirfame hordofuun akka hojjetan ministeerichi akeekeera.

#Oromia #Ethiopia