Oromiyaatti Baatiwwan jahan darban galiin Birrii biiliyoonni 94 ol walitti qabame
Finfinnee, Amajjii 15, 2017 (FMC) – Naannoo Oromiyaatti baatiwwan jahan darban galiin Birrii biiliyoonni 94 ol walitti qabamuu Biiroon Galiiwwanii naannichaa ibse.
Bara baajata 2017 galii Birrii Biiliyoona 200 fi miiliyoona 500 walitti qabuuf karoorfatee hojjechaa jiraachuu Hoggaanaa Itti Aanaan biirichaa Obbo Ramadaan Waariyoo Faanaa Dijiitaaliif himaniiru.
Baatiwwan jahan darbanitti galii Birrii Biiliyoona 100 fi biiliyoona 4 walitti qabuuf karoorfamee galiin Birrii Biiliyoonni 94 walitti qabamuu Obbo Ramadaan ibsaniiru.
Raawwiin kun kan bara darbee yeroo wal fakkatuun yoo madaalame Birrii biiliyoona 36 fi Miiliyoona 900 ol caalmaa qabaachuu kaasaniiru.
Galii Mootummaa Naannoo Oromiyaa guddisuuf hojiileen garaagaraa hojjetamaa jiraachuus himaniiru.
Naannoo hanga Aanaaleetti hojmaataan hogganamuu, rakkoolee kenna tajaajilaan mul’atan bu’uurarraa furuu fi hojii hubannoo uumuu hojjetameen galiin kun walitti qabamuu eeraniiru.
Namoota kenna tajaajilaarratti rakkoo uumaanirratti tarkaanfiileen garaagaraa fudhatamuus ibsaniiru.
Naannichatti yeroo amma kaffalaan gibiraa hubannoo guutuu argateen galii yeroon kaffalaa jiraachuun milkaa’ina guddaa ta’uus Obbo Ramadaan himaniiru.
Tsahaay Gulummaatu gabaase.
#Oromia #Ethiopia