Oromiyaatti Xaa’oo kuntaala miiliyoona 10 ol qonnaan bulaaf dhiyeessuuf hojjetamaa jiraachuun ibsame

Finfinnee, Bitootessa 9, 2017(FMC) – Naannoo Oromiyaatti xaa’oo Kuntaala miiliyoona 10 ol qonnaan bulaaf dhiyeessuuf hojjetamaa jiraachuu Ejensiin Babal’ina Waldaalee Hojii Gamtaa Oromiyaa beeksise.

Dhiyeessii fi raabsaa xaa’oo bara 2017/18 ilaalchisuun Ejensichi ibsa miidiyaaleef kenneera.

Naannichatti hanga ammaatti xaa’oon kuntaalli kuma 300 qonnaan bultootaaf raabsamuu Hogganaan Ejensichaa Obbo Jamaal Kadiir ibsa kennaniin himaniiru.

Mootummaan xaa’oo yeroodhaan qonnaan bulaa fi horsiisee bulaaf akka dhiyaatu xiyyeeffannaan hojjetamaa jiraachuus ibsaniiru.

xaa’oo bara darbe kuntaala kuma 900 bule wajjiin xaa’oo kuntaala miiliyoona 11.4 ol dhiyeessuuf hojjetamaa jiraachuus dubbataniiru.

Sadarkaa Naannoo Oromiyaa qofatti Mootummaan xaa’oo kuntaala miiliyoona 10.5 dhiyaatuf deeggarsa Birrii biiliyoona 32 ol kan taasisuu ta’uu eeraniiru.

Xaa’oon gama Yuuniyenootaa fi Waldaalee Hojii Gamtaan qonnaan bulaa fi horsiisee bulaaf kan dhiyaatu ta’uus kaasaniiru.

Tasfaayee Ijjiguutu gabaase.