Paartiin Badhaadhinaa duudhaalee mandhaleef xiyyeeffannoo kennee hojjechaa jira- Dooktar Tasfaayee Baljigee

Finfinnee, Bitootessa 1, 2017 (FMC) – Paartiin Badhaadhinaa duudhaalee mandhaleef xiyyeeffannoo kennuun addunyaatti akka beeksifamaniif hojjechaa jiraachuu Mana Maree Bakka Bu’oota Uummataatti Ministirri Wamamaa Olaanaa Mootummaa Dooktar Tasfaayee Baljigeen ibsan.

Walharkaa fuudhiinsa Baallii Gadaa Booranaa 72ffaa ilaalchisuun ibsa kennaniin, Itiyoophiyaanonni duudhaalee mandhalee hedduu qabna jedhaniiru.

Sirni gadaa sirna uummanni Oromoo waggoottan dheeraaf itti fayyadamaa ture ta’uu yaadachiisuun, sirna Kanaan hoggantoonni karaa nagaan aangoo waliif kan dabarsaniifi duudhaalee diimokiraasii kan of keessatti hammate ta’uu eeran.

Duudhaa mandhalee kana haalaan misoomsuufi fayyadamuu qabna jedhaniiru.

Aadaafi duudhaaleen bakkeewwan garaagaraa jiranis walitti bu’iinsa hiikuuf, siyaasaaf, diinagdeefi hariiroo hawaasummaaf bu’uura ijoo ta’uu eeraniiru.

Paartiin Badhaadhinaa duudhaalee mandhaleef xiyyeeffannoo kennee hojjechaa jiraachuu kaasuun, sirna gadaa dhaloota egereef dabarsuufi addunyaatti beeksisuuf hojjetamaa jiraachuu ibsaniiru.

Miilkiyaas Ayyalaatu qindeesse.

#Oromia #Ethiopia