Qorannoo sirrummaa sanadoota 358 gaggeeffameen %73 kan sobaati-Poolisii

Finfinnee, Guraandhala 13, 2017 (FMC)- Qorannoo sirrummaa sanadoota 358 mirkaneessuu gaggeeffameen %73 sanadoota sobaa ta’uu Poolisiin Federaalaa beeksise.

Baatiiwwan ja’an darban gaaffiilee dhimmoota yakkaa 191 fi dhimmoota hariiroo hawaasaa 167 Poolisii fi manneen murtiirraa dhiyaataniif irratti qorannoo fooransikii gaggeessuu ibseera.

Poolisiin Federaalaa meeshaalee laabiraatoorii fooransikii ammaayyaa’an qorannoo gaggeessuun bu’aalee qorannoo qaamolee dhimmichi ilaallatuuf kennaa jiraachuu eereera.

Haaluma kanaan qorannoo sanadaa gaggeessuun mallattoolee, chaappaa fi tiitaroota, cheekiiwwan baankotaa, Paaspoortiiwwan, maallaqa biyyoota garaagaraarratti yakka haqanii fooyyessuu raawwatamu, barreeffamoota fi lakkoofsaarratti, akkasumas sanadoota dhaalaa fi kaartaa lafaan walqabatan qorachuun sirrummaa isaanii mirkaneessuun qaamolee dhimmichi ilaallatuuf kan dhiyeessu ta’uun ibsameera.

Bu’uura Labsii farraa malaammaltummaa lakkoofsa 881/2007 keeyyata 23’n sanadoota mootummaa yookaan dhaabbilee ummataa fakkeessuun, guutummaatti yookaan gartokkeen, kan fooyyesse, hir’ise, dabale yookaan haquun gara sandaa sobaatti jijjjiire, sadarkaa yakka raawwateen hidhaa umrii guutuu akka adabsiisuu ragga’eera.

Hawaasnis wayita waliigaltee kamuu raawwatu, bittaa fi gurgurtaa onlaayiniin wayita raawwatuu fi mallatteessu, waliigalaan dhimmoota sanadaan walqabatan sirritti mirkaneeffachuun eeggannoo barbaachisaa taasisuu akka qabu dhaamuu ragaan Poolisii Federaalaarraa argame ni mul’isa.

#Oromia #Ethiopia