Qormaatilee Idil Addunyaa dandamachuuf tokkummaan Afrikummaa cimsuu qabna-Dooktar Geediyoon Ximootiwoos

Finfinnee, Guraandhala 5, 2017 (FMC)- Qormaatilee Idil Addunyaa damee hedduu mudataa jiran dandamachuuf tokkummaa Afrikummaa cimsinee itti fufsiisuu qabna jechuun Ministirri Ministeera Dhimma Alaa Dooktar Geediyoon Ximootiwoos dubbatan.

Walga’ii idilee 46ffaa Mana Maree Hoji Raawwachiistuu Gamtaa Afrikaarratti haasawaa kan taasisan Dooktar Geediyoon Ximootiwoos, damee hariiroo gama hedduun qormaatilee guguddaan mudachaa jiraachuu kaasaniiru.

Afrikaaf hariiroon damichaa murteessaa ta’uu kaasanii, walta’iinsa, waliigaltee fi tumsaatti waan amannuuf hariiroon kun filannoo keenya ta’uu qaba jedhaniiru.

Yeroo ammaa qormaatileen mudachaa jiran hedduun isaanii sadarkaa Idil Addunyaatti waan ta’eef, furmaanni isaanis hammattoo hariiroo gama hedduu fi Idil Addunyaa kan gaafatan ta’uu kaasaniiru.

Jijjiirama qabeenya qilleensaa, faalama naannawaa, babal’achuu gammoojjummaa, dhimmoota fayyaa fi weeraraa Idil Addunyaa dameewwan hammattoo walta’iinsaa gama hedduu kan gaafatanidha jedhan.

Rakkoolee kanneen darbuuf Mootummoota Gamtoomanii, Gamtaa Afrikaa fi waltajjiiwwan damee hedduu fi dhaabbilee cimsuuf tattaaffiin taasifamu dabaluu akka barbaachisu hubachiisaniiru.

Sadarkaa Idil Addunyaatti jijjiiramoota teeknooloojiiwwanii fi morkiiwwan siyaasa quubsumaa cimaa dhufuu eeranii, tokkummaa Afrikummaa yeroo kamuu caalaa cimsuun barbaachisaa ta’uu dubbataniiru.

Akka ardiitti Mana Maree Nageeyaa Mootummoota Gamtoomanii dabalatee dhaabbilee Idil Addunyaa keessatti hanqinaalee mul’atan akka fooyyeffaman hojjechuun barbaachichaa ta’uu ibsaniiru.

Itiyoophiyaan Naannawaa Daldala Bilisaa Ardii kan diinagdee ardichaaf abdii qabeessaa ta’een, hojiin daldalaa akka eegaluuf kutannoo qabachuu himaniiru.

Gamtaan Afrikaa miseensa biyyoota garee 20 ta’uun, waltajjiiwwan Addunyaarratti faayidaalee ardichaa kabachiisuuf carraa akka uumu Itiyoophiyaan ni amanti jedhaniiru.

Leeykun Alamtu gabaase.

#Oromia #Ethiopia