Rakkoolee humnaan furuuf yaaluun furmaata waaraa hin argamsiisu- Piroofeesar Masfin Ara’aayaa

Finfinnee, Bitootessa 27, 2017 (FMC) – Rakkoolee humnaan furuuf yaaluun furmaata waaraa kan hin argamsiisne ta’uu Komishinarri Olaanaan Komishinii Marii Biyyaalessaa Piroofeesar Masfin Ara’aayaan ibsan.

Naannoo Amaaraatti sirni baniinsa boqonnaa ajandaa marii walitti qabuu Yuunivarsiitii Baahir Daaritti gaggeeffamaa jira.

Piroofeesar Masfin Ara’aayaan ergaa waltajjicharratti dabarsaniin, rakkoolee waldhabdee Itiyoophiyaa waaraan furuuf mari’achuun barbaachisaa ta’uu eeranii, marii guyyoottan itti aananiirratti hirmaannaa ho’aa taasisuun barbaachisaa akka ta’e hubachiisan.

Garaagarummaa yaadaa humnaan furuuf walitti bu’iinsota uumamaniin uummanni Amaaraa gatii kaffaluu kaasanii, kunis barbaachisummaa marii biyyaalessaa  kan mul’isudha jedhan.

Waltajjichi boqonnaawwan marii fulduratti gaggeeffamaniif murteessaa ta’uu kaasaniiru.

Humnoonni akka naannichaatti hidhannoon socho’anis gara mareetti akka dhufan waamicha dhiyeessaniiru.

Itiyoophiyaanonni yaada tokkoon yeroo mari’atan diinota isaanii injifataniiru kan jedhan Pirofeesar Masfin, marii biyyaalessaa hafuura kanaan milkeessuun barbaachisaa ta’uu hubachiisan.

#Oromia #Ethiopia