Sadarkaan itti fayyadama dhagaa Cilee biyya keessaa gara %65’tti fooyya’iinsa agarsiiseera jedhame

Finfinnee, Amajjii 21, 2017 (FBC)- Sadarkaan itti fayyadama dhagaa Cilee biyya keessaas %0 irraa gara %65.85’tti fooyya’iinsa agarsiiseera jedhame.

Bara 2007 irraa eegalee fedhiin anniisaa Indaastirii Simintoo Itiyoophiyaa Dhagaa Cilee biyya alaatii galfamu irratti hirkatee turuun ni yaadatama.

Haa ta’u malee, bara 2012 irraa eegalee tattaaffii mootummaan itti fayyadama Dhagaa Cilee biyya keessaa irratti jijjiiramni guddaan mul’achuun ibsameera.

Kanarraa kan ka’e dhiibbaa dhagaa cilee biyya alaatii galfamu irra ture %100 irraa gara %34.15’tti gadi bu’uun eerameera.

Sadarkaan itti fayyadama Dhagaa Cilee biyya keessaas %0 irraa gara %65.85tti fooyya’iinsa agarsiisuun himameera.

Jijjiiramni kun bu’a qabeessummaa imaammata qabeenya kan biyya alaarraa galfamuu caalaa kan biyya keessaaf dursa kennuu kan argisiisuu yoo ta’u, madda anniisaa mirkaneessuu fi qabeenya biyya alaarratti hirkachuu kan hir’iisuudha jedhameera.

Jijjiirama kana keessatti qooda fudhattoota ijoo keessaa tokko Warshaa Omisha Dhagaa Cilee ET Minerals Dhaabbata Dhuunfaa Itti Gaafatamni Isaa Murtaa’e kan Naannoo Kibba Lixa Itiyoophiyaa Godina Dawuroo Naannawaa Tarcaa, Kileeleetti argamu fakkeenyumman ka’eera.

Warshaan kun sa’aatiitti toonii 150 kan oomishu yoo ta’u, fedhii oomisha dhagaa cilee biyyattii keessatti dabalaa jiru guutuuf gumaacha olaanaa kan qabu ta’uun ibsamuu ragaan Waajjira Ministira Muummeerraa argame ni mul’isa.

#Oromia #Ethiopia