Sirni walharkaa fuudhinsa baallii Gadaa Booranaa Marsaan 72ffaan Borurraa eegale gaggeeffama
Finfinnee, Guraandhala 24, 2017 (FMC) – Sirni walharkaa fuudhinsa Baallii Gadaa Booranaa Haroomsaan booda marsaa 72ffaan Guraandhala 25-30, 2017’tti Ardaa jilaa Badhaasaatti kan gaggeeffamu ta’uu Biiroon Aadaa fi Tuurizimii Godina Booranaa ibse.
Sirnichi borurraa eegalee sagantaalee garaagaraan kan kabajamu ta’uu fi Guraandhala 29 immoo Yuunivarsiitii Booranaatti Mariin Paanaalii kan gaggeeffamu ta’uu Itti Gaafatamtuun Waajjira Aadaa fi Tuuriizimii Godinichaa Aadde Alamiituu Qaamphee Faanaa Dijiitaaliif ibsaniiru.
Sirnicharratti Abbootiin Gadaa, Haadholiin siinqee, Abbootiin Amantalee,dhalattoonni Booranaa biyyoota garaagaraa jiraataa turan, artistonnii fi qaamoleen hawaasaa kutaalee biyyatti garaagaraarraa kan hirmaatan ta’uu himaniiru.
Sagantichaan walqabatees Godinaalee Booranaa lameen keessatti torbeen Aadaa labsamuus eeraniiru.
Sirnichaaf uwwisa miidiyaa kennuuf miidiyaaleen biyya keessaa 60 ol Boorana galuus Aadde Alamituun kaasaniiru.
Sirni Baallii dabarsuu Haaromsaan booda kun Abbaa Gadaa Gadaayyoo Galgaloon booda Addaan cituun haroomsi taasifamuu Aadde Alamiituun eeraniiru.
Sirna baallii dabarsuu kanaan Abbaan Gadaa Kuraa Jaarsoon, Guyyoo Boruutti baallii kan dabarsan ta’uun beekameera.
Gadaan Fullaasaas Gadaa Mardiidaaf baallii kan dabarsu ta’uunis eerameera.
Tsahaay Gulummaatu gabaase.