Tajaajilli Kominikeeshinii Mootummaa Yaadannoo injifannoo Adwaa sababeeffachuun ergaa baga geessanii dabarse

Finfinnee, Guraandhala 22, 2017 (FMC) – Tajaajilli Kominikeeshinii Mootummaa Yaadannoo injifannoo Adwaa sababeeffachuun ergaa baga geessanii dabarseera.

Tajaajilichi ergaa isaan Itiyoophiyaanonni hundi baga yaadannoo injifannoo Adwaa 129ffaa nagaan geessan jedheera.

Guyyaan yaadannoo injifannoo Adwaa bara kanaa mata duree” Adwaa Injifannoo Uummattoota Gurraachaa” jedhuun sadarkaa biyyaalessaa, naannolee, bulchiinsota magaalaa, dhaabbilee, Embaasiiwwanii fi Waajjiraalee Qoonsilaa guutuu addunyaatti qindeessummaa Minsteera Ittisa Biyyaan kan kabajamu ta’uu eereera.

Itiyoophiyaan birmadummaa ishee kabachiisuufi tokkummaa uummata ishee eegisuuf diinota alaa ishee weeraran irratti duuluun dirreewwan waraanaa hedduutti injifannoo seena qabeessa galmeessuu yaadachiiseera.

Injifannoowwan kanneen keessaa injifannoo uummata gurraacha maraa kan ta’e Injifannoon Adwaa tokko ta’uu ibsuun, Adwaadhaan guddummaan Itiyoophiyaa kan itti mul’ate, abjuun weerartootaa kan itti fashalaa’e, injifannoo uummata gurraacha maraati jedhe.

Injifannoon Adwaa Itiyoophiyaarra darbee sosochiiwwan bilisummaa akka finiinan, galmee seenaa yaadamni PaanAfrikaaniizimii akka eegalu taasise ta’uu tajaajilichi ergaa isaan eereera.

Injifannoon Adwaa wantoota irraa baratamuu qaban hedduu kan qabu waan ta’eef guyyicha yaadachaafi seenaa isaa sirnaan himuun dhaloota itti aanutti dabarsuun itti gaafatamummaa dhaloota har’aa ta’uu ibsameera.

Itiyoophiyaa birmaduu abbootiirraa dhaalle, tokkummaan ishee eegamee nageenyi ishee mirkanaa’e dhaloota dhufu dhaalchisuuf dirqama qabna jedheera.

Qormaatilee yeroo ammaa mul’atan haalaan hubachuun hojiilee misoomaa, nageenyaa gama maraan eegalaman itti fufsiisuun; Itiyoophiyaa badhaatee fi wabiin nyaataa ishee mirkanaa’e ijaaruun ijoolee gootota Adwaa ta’uu keenya mirkaneessuu qabna jechuun hubachiiseera.

#Oromia #Ethiopia