Yaa’iin Gamtaa Afrikaa 38ffaan milkiin xumurame – TKM

Finfinnee, Guraandhala 10, 2017 (FMC) – Yaa’ii Idileen Hoggantoota Gamtaa Afrikaa 38ffaan milkiin xumuramuu Tajaajilli Kominikeeshinii Mootummaa beeksise.

Tajaajilichi Yaa’ii Gamtaa Afrikaa 38ffaa Magaalaa Finfinneetti taa’amaa ture ilaalchisee ibsa kenneera.

Yaa’ii Idileen Hoggantoota Gamtaa Afrikaa 38ffaa fi Walga’ii Idileen Mana Maree Hoji Raawwachiiftuu Gamtaa Afrikaa 46ffaan milkiin xumuramuu Ministir Deetaan Tajaajila Kominikeeshinii Mootummaa Tasfahuun Goobazaayi ibsaniiru.

Yaa’icharratti haala kanaan duraarraa bifa adda ta’een keessummoonnii fi ogeeyyiin miidiyaalee hedduun hirmaachuu kaasaniiru.

Yaa’ii bara kanaa kan adda taasiisu wayita Itiyoophiyaan hojiilee dippiloomaasii milkaa’oo hedduu raawwatteetti taa’amuu isaati jedhan.

Yaa’ichi rakkoo tokko malee milkiin akka xumuramu qaamolee gumaacha taasisaan hunda galateeffataniiru.

Keessummoonni kumni 12 yaa’icharratti hirmaachuu dubbataniiru.

Yaa’ichi milkiin akka xumuramu Koreen Biyyaalessaa dhaabbilee 35 irraa hundaa’ee hojii hojjechaa turuu himaniiru.

#Oromia #Ethiopia