ሀገራዊ ምክክሩን አካታች ለማድረግ ፖለቲካ ፓርቲዎችን በስፋት ማሳተፍ ይገባል ተባለ

አዲስ አበባ፣ መጋቢት 25፣ 2017 (ኤፍ ኤም ሲ) የኢትዮጵያ ሀገራዊ ምክክር ኮሚሽን በቀጣይ የምክክር ምዕራፎች ዙሪያ ከፖለቲካ ፓርቲ አመራሮች ጋር ተወያይቷል፡፡

የኮሚሽኑ ዋና ኮሚሽነር መሥፍን አርአያ (ፕ/ር) በዚህ ወቅት÷በዛሬው ዕለት ከፖለቲካ ፓርቲዎች ጋር የተደረገው ውይይት ለ9ኛ ጊዜ የተካሄደ መሆኑን አንስተዋል፡፡

ሀገራዊ ምክክሩን አካታች ለማድረግ ፖለቲካ ፓርቲዎችን በስፋት ማሳተፍ እንደሚገባ ገልጸው÷ፓርቲዎች ከኮሚሽኑ ጋር ተቀራርበው እየሠሩ በመሆናቸው አመስግነዋል፡፡

በመድረኩ ኮሚሽነር አምባዬ ኦጋቶ (ዶ/ር) ባቀረቡት ጽሑፍ÷በእስካሁኑ ሒደት በሀገራዊ ጉዳዮች ላይ በተከናወኑ ውይይቶች አንዱ የሌላውን ችግር እንዲረዳ ዕድል መፈጠራቸውን ተናግረዋል፡፡

ማንኛውም የፖለቲካ ኃይል በምክክር ሒደቱ ላይ መሳተፍ አለበት ያሉት ኮሚሽነር አምባዬ÷ ለዚህ ደግሞ ኮሚሽኑ የፓርቲዎችን ድጋፍ እንደሚፈልግ መግለጻቸውን የኮሚሽኑ መረጃ ያመላክታል፡፡